[أ/محمد ابراهيم]

بقلم الشاعره والكاتبه .. رحاب رسلان ..

منتاش .. منتاش
***************
عاش البوب.. عاش عاش
واحد غيره ما يلزمناش

مالكوا أنتوا يا حاقدين بيه؟
أصلا معترضين على إيه ؟!
حزبه و هو حر فيه
إن شاء الله يغسله .. يكويه
عمرنا ما حنفهم زييه
ده إحنا من غيره ما نسواش
عاش البوب .. عاش عاش

ده سابقنا بسنين ضوئيه
و فى دماغه أفكار ذريه
حتى لو عين حراميه
حتبقى خطه تكتيكيه
و خطوه فى سبيل الحريه
أهم حاجه ما يسيبناش
عاش البوب .. عاش عاش

و لو قال لنا على نفسه عميل
حنقول لأ .. ده أنت جميل
بلاش يا بوب هزار تقيل
طب و الله ما أنتاش ما أنتاش
و عاش البوب .. عاش عاش