[thehero2007]

السلام عليكم

اسمحولى اشارك معاكم

انا من رأيى اى حد يزعل ويتعب صحته على الثانويه العامه يبقه بيفكر غلط!!

يا جماعه لازم نفوق ونشوف الدنيا ماشيه ازاى ورايحه بينا على فين ...

دلوقتى التعليم فى مصر ليس له اى قيمه وشوفوا اللى اتخرجوا عملوا ايه وظروفهم عامله ازاى وحالتهم الماديه عامله ازاى وعارفين يشتغلوا اى حاجه والا مش عارفين علشان نفسيتهم تعبانه بعد قضاء 17 سنه فى التعليم واحيانا توصل الى 20 سنه بيتعلم ويصرف يواخد من جيب والده ووالدته وفى الاخر هيبقه ايه !!!!!! ولا حاجه

يا اخوانى واخواتى لازم فكرنا يتغير وكل واحد يعرف قدراته وحدوده وبناءا عليه يبدأ يفكر صح ويبص للمستقبل

المستقبل مش فى التعليم والثانويه والكليه وبس ...لالالالالالالا

ممكن واحد يدخل صنايع ويتعلم صنعه تأمن له مستقبله ويكون احسن من الاف المتخرجين من الكليات وينصدموا بالواقع لما يلاقوا البلد مقفوله والحاله زى الزفت ( معذرة فى اللفظ ) وهيفضل ياخد مصروف من والده ووالدته

الخلاصه يا جماعه

الثانويه العامه مش نهاية العالم ولا الجامعه كمان على العكس تماما سوق العمل ونهايتك من التعليم هى بداية حياتك وكل واحد لازم يأقلم نفسه ويعرف امكانياته كويس ومبيصش لصاحبه او قريبه او جاره ويقول اشمعنه ده واشمعنه ده لالا صدقونى بعد كده انته هتبقه احسن منه لانك وظفت امكانياتك كويس وفكرت صح ومشيت فى الطريق الصح وان شاء الله ربنا يكرمنا ويكرمك جميعا

بالنسبه لمصر يا جماعه انا اتفقه معاكم ان فيه فساد وفيه نصب وفيه سوء تخطيط وفى غلاء وفيه كل حاجه وحشه

بس هل تفتكروا ان الهجره هيه الحل ؟؟؟ وانك تسيب بلدك للنصابين والفاسدين ده هيحل القضيه ؟؟

لالالالالالالا

هفكركم بآيتين هم سبب ما نحن فيه

"ظهر الفساد فى البر والبحر بما كسبت ايدى الناس"

"ان الله لا يغير ما بقوم حتى يغيروا ما بأنفسهم"

كل واحد فينا لازم يغير من نفسه ويشيث ببلده ووطنه ويحاول يصلح فيه ولو لقيت حاجه غلط حاول تصلحها وتنصح اى حد تشوفه يعمل حاجه غلط ولما كلنا نصلح من انفسنا ونصلح من حوالينا هنلاقى المجتمع كله بقه كويس ومصر هيرجع فيها خير وبركه من تانى

والله يا جماعه برغم الصعاب والمشاكل اللى بنشوفها بس الواحد عنده أمل ان الحال ينصلح من جديد

بلاش نظرة التشائم والبؤس ونخلى عندنا أمل وعزيمه وبالتفكير السليم والتخطيط والتقرب الى الله عز وجل ربنا هيصلح حالنا كلنا "فقلت استغفروا ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم انهارا"

وبلاش ننظر لنصف كوب الماء الفارغ فهناك نصف اخر ممتلئ!!!


كلامى ده بقوله من القلب وان شاء الله يصل الى القلب وربنا يصلح حالنا وحال البلد ويحفظ مصر من شر الفاسدين وكيهلك كل من اراد بها سوء يارب العالمين

وشكرا لكم

والسلام عليكم ورحمة الله وبركاته