مجرد رأي
الموضوع مش الثانويه العامه تبقي سنه ولا سنتين .. هتفرق ايه ؟ " عنق الزجاجه " مهما حصل .. و ايه التطوير اللي حصل لما ضافوا سنه سادسه ؟ و ايه التطوير اللي هيحصل .. الطالب زي اللعبه في ايدين النظام ... و طلبه علمي رياضه اقرب مثال .. التفاضل اللي كل الطلبه بتدخل المفروض ناويه تقفله لسهولته .. معرفوش يعملو فيه حاجه .. بمعني ان النظام لو عايز يعجز الطالب هيعجزة .. الامتحانات صعبه او لا .. كده كده اللي هم عايزين يعملوه هيعملوه ..
أعتقد ان اللي المفروض يتعدل هي المناهج .. ايه لازمه ان الطالب يدرس جيلوجيا و كيميا و فيزيا مثلا .. و هو ملهوش اي ميول للمواد دي ؟ لو قلنا انها هتفتح دماغه و توسع تفكيره.. الطالب اللي بيدرس مواد العلمي بيبقي جاهل بمواد الادبي و العكس .. لازم نعرف ان التفكير بيتوسع مع التعامل مع الحياه .. " العقاد كان معاه ابتدائيه " و اصبح العقاد ولاكنه درس في المكتبات لانه حب القراءه .. بمعني ان هي مش بكتر المناهج اللي بتتحشي في دماغ الطالاب و بس ... و اكيد لو نظام التعليم ركز علي الاقسام اللي كل طالب ممكن يحبها و يتخصص فيها .. هنلاقي كل الطلبه بتجيب مجاميع عاليه جدا في المجالات اللي هم حبينها و عايزين يتخصصوا فيها .. و دا ميمنعش ان يكون في قشور من مواد تانيه عشان ميكونش الطالب جاهل في باقي المجالات .. و بالطريقه دي هنلاقي المهندس الناجح و المتفوق في مجاله .. و الجيلوجي الناجح اللي درس الجيلوجيا بناء علي رغبته .. و نسبه العلماء هتزيد زياده كبيره .. بدل ما احنا فرحانين ب " د/زويل " بس .. هنلاقي آلاف زي الدكتور زويل .. دا إذا كان النظام عايز فعلا ينمي ابناءه .. مش عايز يطبق فينا اهداف اليوجينيا " اللي اتعلمناها في القراءه مثلا " فعلا استعجبت اما قريت الدرس دا .. و يعتبر الدرس الوحيد اللي شدني في العربي .. و اكن الكتاب مرايه للواقع عندنا ..
لو في افكار معارضه لنظرتي .. اتمني نتناقش فيها ان شاء الله ..
آخر تعديل بواسطة SoulAssass1n ، 23-06-2008 الساعة 04:06 PM
|