اقتباس:
المشاركة الأصلية كتبت بواسطة lally adel
حاجة تانية بقى يا جماعة قصة الانجليزى انا جالى شلل اطفال منها مش عارفة اعمل فيها ايه ..
و ف العربي انا مش بعرف افرق بين حالة اسم التفضيل اللى هى مضاف الى نكرة و المجرد من ال و الاضافة لما يكون جاى بعد اسم التفضيل اسم نكرة .. لو حد يعرف طريقة ليها يا ريييييت يقولى ..
و بالنسبة للناس اللى الانجليزى مستوى رفيع اخبار الدروس ال reading ايه لانى لسه ماذكرتهاش .. سهلين يتلمو يعنى ولا رخميين ..
حاجة اخيرة بقى اخباركو ايه ف مراجعة العربي و خاصة القصة ؟؟
|
ليه دة قصة الإنجليزى جميلة .. طيب بذمتك كدة مش أحسن من التهريج بتاع العناكب بتاعت ثانية ثانوى ؟!
علشان تفرق بين اسم التفضيل المضاف لنكرة و المجرد من أل و الإضافة بتقارنى بين المفضل و المفضل عليه .. فإذا كانوا من نوع واحد فهو مضاف لنكرة .. و إذا كانوا من نوع مختلف فهو مجرد من أل و الإضافة
مثال : المعلمة أفضل امرأة .. هى المعلمة أية يعنى مش امرأة ؟! إذاً هو هنا مضاف لنكرة و امرأة مضاف إليه مجرور
حضارة مصر أعظم حضارة .. ما هى حضارة مصر حضارة برضة يبقوا من نوع واحد و برضة مضاف لنكرة
و هكذا بقى : المعلم أفضل رجل .. مصر أفضل بلد .. إلخ
إنما تفرق مثلاً لما أقولك مصر أطيب هواء .. مصر مش هواء !! يبقوا من نوع مختلف يبقى مجرد من أل و الإضافة و هواء دى تمييز
مصر أعظم حضارة .. مصر مش حضارة !! نفس الكلام
----------
المستوى الرفيع عامل زى السبرتو الدروس بتتبخر فى ثوانى لازم تراجعى عليها بصفة مستمرة
الوحدة الأولى عن هاواى .. وحدة غاية فى الرخامة ولا ليها أى لازمة و أسماء مكلكعة و خلافه
الوحدة الثانية عن ماريا مونتيسورى .. أكبر وحدة لكن جميلة و سهلة بس بتتنسى بسرعة برضة
الوحدة الثالثة عن الـ global thinking عبارة عن 3 مواضيع ممكن تذاكريهم لأول مرة فى ساعة و نصف مثلاً لكن بيتنسوا أسرع منهم جميعاً و خاصة الدرس الثانى بتاع الإنفجار السكانى مليان أرقام
باختصار يعنى نصيحتى المستوى الرفيع الإنجليزى يبدأ على الأقل من شهر 1 حصة واحدة فى الأسبوع .. لو ماكنتيش لسة بدأتيه يبقى أبدأى فوراً .. أسئلة الحفظ دى لازم تحطيها فى جيبك إن شاء الله لأن الامتحان في حاجات تانية مالهاش منهج زى rewrite و القطعة الثانية الى بيبقى عليها اختيار من متعدد ( ارخم سؤال فى الامتحان ) فلازم تضمنى دول إن شاء الله
----------
و بعد جهد أسطورى و بعد ما كان هايحصلى حاجة منه أخيراً قدرت أجمع منهج العربى و القصة بأجزائها الثلاثة
بس لسة برضة عايز أثبتهم أكثر و خاصة اللغويات ( أرخم سؤال فى الامتحان )