[عطية محمد طلبة]

على بركة الله نبدأ مع بعض ونركز
أولا لازم نعرف حاجة أساسية قبل الكشف فى المعجم
فكرة الكشف فى المعجم تتلخص إنى لازم أرد الكلمة إلى ثلاثة حروف بسى بشرط الثلاثة حروف تكون خالية من ( ال - الضمائر - التاء المربوطة - التضعيف - الألف ( خد بالك الألف مش الهمزة ) الهمزة ممكن تكون ضمن الثلاثة حروف
دلوقتى انت هاتسأل ازاى أرد الكلمة لثلاثة حروف ؟؟؟؟؟؟؟؟؟؟؟؟؟؟؟؟؟؟
أقولك بسيطة فيه مثل بيقول : على الأصل دور....وهو ده اللى أنا عاوزه على الأصل دور
هتسأل : أعرف الأصل إزاى
أقولك أصل الكلمات فى اللغة العربية هو الفعل الماضى المجرد (3 حروف)
هتسأل طيب أ جيبه إزاى
أقولك كل كلمة إلها ظروفها ويكون ذلك كالتالى :
(1) لو الكلمة اسم هات الفعل الماضى من الاسم ده
مثال: المحاضرات : المفرد محاضرة ....لاحظ أنا عاوز أخليها 3 حروف أصلية
لو حذفت التاء المربوطة يبقى محاضر ...لازم نحذف كمان حرفين زايدين
من وجهة نظرك نحذف ايه ...بسى تبقى الكلمة تحتفظ بمعناها : قول كدة......... أحسنت ( حضر) حذفنا الميم والألف
(2) لو الكلمة فعل يرد إلى الماضى المجرد (3حروف)
مثال : يثق ......ده مضارع الماضى منه (وثق) يبقى نكشف عنه فى وثق
مثال : صل..........الماضى وصل وهكذا فى كل النظائر
(3) لو الكلمة فيها حرف مشدد يغك التشديد عند الكشف فى المعجم
الحق ....حقٌ......حقق وهكذا
(4) لو الثلاثة حروف فيهم ألف لازم تخلى الألف واو أو ياء ....وبرضه مش بمزاجك برضه
لازم نستعين بصديق هتقولى مين هوه : أقولك الفعل المضارع أو المفعول المطلق وياريت تخليك مع المضارع الاول
إن تحولت الالف فى المضارع إلى واو يبقى أصلها واو ....وإن تحولت إلى ياء يبقى أصلها ياء
مثال استعان : لازم أخليه الأول 3 حروف ....يبقى ( عان ) فيه ألف أجيب المضارع ( يعون) يبقى الألف تكون واو وبالتالى نكشف عنه فى (عون)
هتقولى وليه ميكونشى المضارع ( يعين )
أقولك معلومة خليها حلق فى ودنك المضارع لما يكون مبدوء بياء مضمومة أو تاء مضمومة يبقى الماضى ثلاثى أوله همزة
يعنى لو قلت يعين يبقى الماضى أعان وليس (عان) لإن عان المضارع يعون ...........خلاص ...ماشى
(5) فيه كلمات محذوف منها حرف عند الكشف فى المعجم يرد المذوف من الكلمة
هتقولى ما بعرفشى الكلمة اللى محذوف منها حرف
أقولك ما تشلشى هم لان دى كلمات إلها شكل معين وهى كمات معروفة هأقولك عليها بسى ...صلى على النبى
المحذوف من أى كلمة حاجة من اتنين إما أن يمون أول الكلمة أو يكون آخر الكلمة
خلينا فى اللى أولها حرف محذوف ...أى كلمة أولها حرف محذوف لازم يكون الواو ومفيش غيرها
ايه هى الكلمات ديه...( سمة -هبة - عظة - ثقة - مقة - دعة - عدة - زنة - صلة - سِنة )
الكشف على الترتيب ( وسم - وهب - وعظ - وثق - ومق- ودع - وعد - وزن - وصل - وسن )
لو الكمة محذوف منها حرف فى الآخر ايه الكلمات دى ..( أب - ابن - أخ - سَنة - كرة - يد - دم )
الكشف على الترتيب........................................... .( أبو - بنو - أخو - سنو - كرو - يدى - دمى) لا حظ آخر كلمتين
(6) لو الكلمة بادئة بألف وصل يلهخا تاء مشددة تحذف األف وتقل التاء واوا
مثال: اتًحاد - اتصال - اتكاء - اتئاد )
الكشف على الترتيب ( وحد - وصل - وكأ - وأد


هذه ببساطة كيفية الكشف فى المعجم
أسال الله العظيم أن يفيد بها وأن يهب ثواب هذا العمل إلى آبائنا وأمهاتنا وأساتذتنا حيهم وميتهم وأخص منهم الدكتور عيد درويش رحمه الله وطيب ثراه
ونسالكم الدعاء بظهر الغيب

والآن
اختبر معلوماتك : الأبناء - السمات - القاسية - الحياة ......
اكشف فى معجمك عن هذه الكلمات ...........انتظر إجابتك