[مستر الادهم]

انا اخوان ..

مفيش مانع تكون اخوان ولو حتى انت مش اخوان ..
مفيش جامع عليه يافطه .. انا ملاكى للاخوان ..
مفيش مصحف انا شفته .. باصدار تانى من القرآن !

ورب الكعبه قلناها وده اسلوب ..
حياتنا واحنا خضناها عشان مطلوب..
من الواحد .. ينصر أمته وناسه..
يغمس عرقه من فاسه..
بشرع الدين ..

بينا .. أو بناس تانيين !

انا قلت انت مش مسلم ؟؟
طب اقعد طب حنتكلم .. وفهمنى !!
يجوز الكلمة ..بدون القصد جت منى !!

فلان كافر !!
طب اركز طب وفكرنى .. منيش فاكر !

ودور فى الشنط عندك وشوفها وبص
وهاتلى الفتوى من عندك وإقرا النص !
وفهمنى !

انا اللى عرفته من ناسي .. انى حرام أكفّر حد
مسلم حتى لو عاصى .. غير لو قالى انه ارتد
وفى بعض الشروط شوفها , أو اسأل عنها تعرفها ,
مش الموضوع !

انا الفكره ان اخوك موجوع !

مفيش مانع تعارض ناسي .. اعارض فيك !
وحرفع قبعة راسي واسقف ليك

انا وانت وغيرنا فى ثورة التحرير
تعبنا عشان يفوق غيرنا ومات عصافير
عشان نقدر نقول كلمة كفايه وغور !
فمش حاجى على حقك يا جخ وابور !!

انا لو حابب انى اقوم حقوم واحلف
ومش حنسى كلامك يوم .. واحنا بنحمى فى المتحف
في يوم جمعة غضب بليل ..
وشفنا الموت وشفنا الويل ..

ومين حببنى فى الكلمة وفى الشعرا وفى القواميس
ومين قال شعره يوم مره .. دخل قلبي ومين يا هاويس ؟

انا اخوان ..
ومش حنبح في يوم زوري ..
واروح احكى على واجبي وعلى دوري
ومين خد منى بوكسايه فقام هوبا اترزع فى الارض
وانى بحمل الرايه .. انا حامى الحمى والعرض !!

انا بعمل عشان مجنون بحب بلادي وبدينى
وربي يقّدر اللى يكون .. ويرزقنى ويدينى

انا خدت البلد كحلى وحيطة كبيره مسدودة !
وانا وياريته مسموحلى احولها في يوم بيضه !

أبيّض حته من ناحيه .. بتسود فى حتت و حاجات
اموت فى كلاب صاحيه .. بتولد لى مئات الافات !

يا عم هشام .. منيش قادر اقول فى كلام ..
كتير معروف .. انا اصلا بموت من الخوف ..

وانا بحكم !
وخايف من حساب ربي .. وهو بحالى ده يعلم !

يا عم هشام انا اخوان ..
منيش لا ملايكة ولا شيطان ..
ومش عيب اعترف غلطان ..

ولكن لو غلطت فى يوم .. عشان عادى انا انسان ..

انا مش حخون ..

انا اخوان