[على الحنفى]

عصام سلطان يكتب: ثقوا بنا .. تجدوا ما يسركم ..


- هتنزل يوم 30 ..؟
- طبعا هنزل هى دى عايزة كلام ..
- ليه .. ؟
- علشان البلد زى الزفت وكل حاجة زبالة والرئيس أداؤه صفر والحكومة تحت الصفر ..
- يعنى انت نازل تعارض الرئيس ولا نازل تسقطه ؟
- أسقطه طبعا .. يعنى إيه أعارضه ، مفيش وقت خلاص الراجل بقاله سنة كاملة معملش حاجة ..
- طيب هل هتسقطه بسلاح ولا من غير سلاح ..؟
- أنا مليش دعوة ، أنا هنزل وخلاص ووالله لو حد استخدم السلاح هو حر وكل واحد بيعبر عن رأيه وبعدين الناس خرجت من هدومها خلاص ومعذورين فى إللى يستخدموه ..
- طب وبعد مايسقط هتعملو إيه ، هتعملو إعلان دستورى مثلا ولا انتخابات علطول ولا دستور .. ورؤيتكم إيه فى مشكلة الغاز والسولار والكهربا وأمن سينا وسد النهضة بتاع أثيوبيا ..
- إحنا مين ..؟
- انتو اللى نازلين يوم 30 ياعم انتا نسيت ولا إيه ؟
- لا بالعكس بس انت لازم تحدد لان الفلول نازلين معانا وبصراحة هما دول بتوع السلاح مش احنا وهما رؤيتهم معروفة ، هيرجعوا الدستور القديم وهيرشحوا جمال مبارك لأنه الوحيد اللى تنطبق عليه المادة 76 وأبوه لاينتوى الترشح وعموما هما كلهم فاسدين زى مانت عارف .. إنما احنا لينا رؤية محددة وواضحة جدا ..
- تفتكر مين اللى هيمشى كلامه على التانى هما اللى معاهم سلاح ولا إنتو السلميين ؟
- طبعا احنا .. المسألة مسألة تكتيك فقط ، إحنا بنستخدمهم مرحليا وبعدين هنضربهم بالجزمة دول فلول ولاد ....
- وبعد ما خطتكم تنجح وتضربوهم بالجزمة هتعملو إيه ؟
- فى إيه ؟
- فى البلد ..؟
- هنحط مجلس رئاسى مدنى لفترة انتقالية ..
- أيوه كمل كلامك كله للآخر مين اللى هيحط ومين اللى هيتحط وهل بانتخابات ولا من غير انتخابات وهتعمل إيه فى المشاكل اللى عايزة حلول فورية ..؟
- لأ ماهو متحملنيش مشكلات نظام فاسد بقالو 30 سنة بيخرب فيها !! المشاكل دى عايزة وقت على الاقل خمس او عشر سنين علشان تتحل !! وبعدين أنا ديمقراطى والمجلس الرئاسى هيكون بالانتخاب طبعا ..
- طب لو نجح الإسلاميين ؟
- لازم اعزلهم قبل الانتخابات ..
- المحكمة الدستورية هتحكم بعدم دستورية العزل ..
- هحلها قبل ماتحكم ..
- القضاء هيتضامن معاها وهيضرب وهيمتنع عن الاشراف على الانتخابات ..
- مش مهم هجيب موظفين محترمين ..
- العالم مش هيعترف بيك ..
- مش مهم ، العالم كله ضدنا أصلا وفيه مؤامرة إن مصر ماتوقفش على رجليها وبيحاربونا وبيحاصرونا بالمشاكل وافتعال الأزمات عن طريق أذنابهم فى الداخل ..
- كلامك شبه كلام مرسى ..
- مرسى مين ..
- اللى انت نازل تسقطه يوم 30 ..
- والله العظيم
- والله العظيم .. ومع ذلك أنا عايز اسمعك للآخر واكمل اسئلتى ، افرض الأمور استتبت ليكم وجه الاسلاميين حددوا يوم 30 / 7 لاسقاطكم بمناسبة مرور شهر دون انجاز أو حل أى مشكلة هتعملو إيه ؟
- أولا حكاية شهر دى ماتنفعش خالص لأن الديقراطية بتقول لازم تحاسبنى بعد ماتدينى فرصتى فى الحكم ، والفرصة هى مدة رئاسية كاملة ، ثانيا هناك فرق بين المعارضة وهى حق مكفول لك ، وبين إسقاط النظام وهذا ليس حقك ، والقانون والدستور بيجرموا ده وممكن أواجهك بقوات الأمن لحماية الشرعية المتمثلة فى إرادة واختيار الشعب ، لأنى لو سبتك تسقط النظام يبقى كل يوم هتطلع مجموعة جديدة تعمل زيك والبلد تنتهى تماما ..
- أمال انت نازل يوم 30 /6 تعمل إيه ..؟
- هسقط النظام بردو .. بس ده هيبقى آخر إسقاط له .. لأنه بعد كدة هيفضل معدول .. وأنا بضمنلك دى برقبتى .. وانت وكل المصريين لازم تثقو فينا .. ماينفعش كدة ياجماعة .. هنفضل نخون بعض لغاية امتى .. قلتلك كل المشاكل هتتحل والبلد هتستقر وهتبقى زى الفل .. هناك فعلا أزمة ثقة .. ولازم نحلها .. بالتقارب .. والحوار الوطنى .. بعد مانعدل البلد الأول ..