السلام عليكم ورحمة الله وبركاتة
مش عارف ليه حاسس اكنك بتمثل استاذ اعرفه بكل التفاصيل
مش ناقص غير يكون طولك قصير شوية وابيضاني وشعرك ناعم واسود جدا وبتربي دقنك وبتلبس بدل كتير واسمك اشرف
ما علينا
--
بص يا استاذنا
اما قبل :
المفروض وما كان ينبغي عليك فعله انك متفكرش في حاجة زي دي
بس تقريبا الحدث ده هيكون نتيجه لفراغ عاطفي او حالة من الكبت
وكمان انا متأكد بنسبه 80 % ان ترددك اكتر علي دروسك وقلما لما بتروح مكان
يكون فيه بنات تانيه بالشكل اللي بيبقي في المجموعات بتاعتك
اذن فلما جيت تختار عينك يمكن اختارتلك افضلهم
بس خد بالك - في نطاق مجموعتك بس -
يعني لسه متعرفش اذا كان فيه فرصه احسن من كدا ولا لاء
ابقي فكر في النقطه دي شوية
اما بعد :
اللي حصل حصل وخلاص وقعنا في بحر الحب وغرقنا حتي اذنينا
يبقي لازم نتصرف او نعرف هنعمل ايه او ممكن نعمل ايه ؟
لازم الاول اكون مؤمن ان نصيبي مفيش حد هياخده غيري
تاني حاجة النصيب بيجي في اي حته
انا اعرف واحد كان في سفاري بيودي شغل شاف بنوته نزل سأل عليها
وجاب اهله وراح ارتبط بيها علي طول قول سبحان الله
اهوه نصيبه لو ف اي حته هياخده
تالت حاجة :
زي ما قولتلك انت ترددك علي مكان واحد .. ممكن يكون اعجاب واتحور لتعود
بس لو هوا كدا يبقي انت محتاج تقييم نفسك تاني
رابع حاجة :
حاول تتردد علي اماكن تانيه بأي شكل .. لان اللي بيخلينا نحب اننا بنشوف اللي معانا ده هو كائن مُنزل لا قبله ولا بعده - في رأيي -
لكن لما بنشوف احسن منه بتبدأ تتغير الفكره - مش الاحساس -
فلو كان الحب غير مُكتمل وعلاقه مكتوبلها الفشل .. هيتغير الاحساس مع تغير الفكره ..
خامس حاجة او سادسها مش مشكلة :
لو بعد كل محاولاتك وبعد كل الحاجات دي ولسه البنت في دماغك
خلاص ( ابدأ ) انك تشوف بقي ايه نظامها اصلا
يعني محترمه ولا لاء .. لبسها .. حد من شباب الدرس ده بيتكلم عليها ؟ .. بنت ناس ولا .. عقليتها هتناسبك ؟
وبكدا يبقي انت في اول الخطوات .. بعد كدا شوف النتائج لو نسبة رضائك علي النتائج تسمحلك انك تكمل كمل
لو مش راضي عن النتائج يبقي كرم من عند ربنا
في حالة النتائج المقبولة :
هتروح تتكلم مع اهلها وتشوف اذا كانت هتبقي فتره خطوبة لحين دخولها الكلية وقبل الانتهاء بسنة او بعده بسنه تبقي مراتك وشوف ده يناسبهم ولا لاء ..
.. اوعي ثم اوعي ثم اوعي تتساهل لان البنات في الفتره دي ليهم شوية حاجات معينه هبقي اذكرهالك بعدين لاني اتكلمت كتير
.. اوعي تتساهل مع اهلها كمان وعرفهم ظروفك وعلي حسب استنتاجي انك لسه في بداية حياتك يعني مش تعمل زي اللي بيخطبوا ويروحوا يجيبوا هدايا بألفات مؤلفه عشان يظهر حلو ..
لاء خد في الاعتبار انك لسه يعني اربع خمس سنين وشوف بقي انت مواسم اد ايه وكلام اد ايه واعياد ميلاد وما ادراك اعياد الميلاد وعيد الام وعيد تحرير سينا بقيىى
ده في حال انك نجحت في انك تمشي علي الخريطة اللي ادتهالك
وعلي فكره الحل بتاعي ده هيبقي عباره عن عده اهداف انا من رأيي (وبموضوعيه) حاول تنفذها
لكن كل حل مرتبط بنتيجه وعلي حسب النتيجه هتبقي النتيجه
في النهايه وقبل كل ده صلي استخاره عشان تقدر تنفذ الحل كويس
السلام عليكم وانا في الخدمة
اتمني الإفادة