على فكرة انا هكلمك عن هندسة انا خريجة هندسة عين شمس دفعة 2002 و ايامنا هندسة كانت بتقفل على 91% و كان فى منها بينزل مرحلة تانية كمان مع ان المجاميع كانت عالية و الغريبة بقى ان فى السنة بتاعتى و اللى قبلها اللى هى اول سنة لكلية حاسبات كانت بتاخد اعلى من هندسة يعنى انا كنت جايبة 95% و مكنتش الحق غير حاسبات حلوان سبحان مغير الأحوال بص يا سيدى الخلاصة من حد اكبر منك هندسة كلية شغل مش دلع و يا ما ناس دخلت هندسة و سقطت و حولت تجارة بعد كدا اهم حاجة لازم تعرفها ان كلية هندسة بالذات اعدادى هندسة تشبه كتير ثانوية عامة فهى سنة تمهيدى بتأهلك لأقسام الكلية بعد كدا بتتدرس فيها فيزيا و كيمياء و ميكانيكا و رياضة و طبعا بتاخد مواد جديدة اللى هى رسم هندسى و هندسة وصفية طبعا بعد السنة دى انت بتعرف ميولك اكتر لأى قسم و بتختار على هذا الأساس بالنسبة بقى لحاسبات فى الأساس هى كلية عايزة واحد بيحب الكمبيوتر و البرمجة الموضوع على فكرة مش كيميا بس على الأقل يكون عندك مييول او حب للموضوع و بما انى مهندسة كمبيوتر و متزوجة زوجى خريج حاسبات و عرفت ناس كتيرة حاسبات فا انا شايفة ان حاسبات فى الشغل بيكونو افضل شوية من هندسة حاسبات لأن دراستهم عملية اكتر و بتدخل فى المضمون على طول و هى 4 سنين بس مشكلة كلية حاسبات انها مش تبع نقابة المهندسين و بالتالى حضرتك رسميا مش مكتوب ف البطاقة مهندس لكن طبعا فى شغللك هتتعامل زيك زى خريج هندسة طبعا انت هتقولى لزمته ايه الرغى دا كله هقولك يا سيدى انا بديك فكرة عامة و هنصحك نصيحة انت ولد و محتاج تشتغل و تحس بنجاحك فكر فى الكلية اللى هتخرج منها تعرف تشتغل و تنجح انا شخصيا معرفش تجارة انجليش بس انا شايفه ناس بتخرج منها فى الأخر عشان تشتغل فى كول سنتر لشركة او بنك و دى وظيفة اى مؤهل تانى يقدر يعملها طالما اللغة عنده كويسة انا بصراحة مش عايزة اظلم الكلية بس احنا على ايامنا مكناش بنسمع عن تجارة انجليش دى عامة صلى استخارة و سلم امرك لله و إن شاء الله ربنا يوفقك للخير ...اه نسيت لو هتدخل هندسة خاص ادخل الأول على موقع النقابة اتأكد انها مسجلة فى النقابة عامة اللى انا متأكدة منها هى اكاديمية اخبار اليوم و مصر الدولية و الفرنسية و الألمانية و الجزيرة و الكندية و جامعة مصر للعلوم و التكنولوجيا
|