بص إنتا مجموعك يخليك تدخل حاسبات مستريح وحاطط رجل علي رجل ، وفي الحالة دي أنصحك تدخل عين شمس.
لازم تحب الكمبيوتر وتعرف ان هو مستقبلك وتقرأ كتير وتطلع في مجال البرمجة.
لو عايز تبقي متفوق وتشتغل في شركات كبيرة زي مايكروسوفت أو جوجل .... إلخ
يبقي متكتفيش باللي بتدرسة في الكلية بس ، لازم تنمي من نفسك وتقرا كتب إلكترونية عن البرمجة ، لإن اللي هتدرسه هيأهلك بنسبة 50% ، وباقي الـ 50% دي انتا اللي هتوصلها بتعبك ومجهودك وهي اللي هتميزك عن باقي دفعتك لما تتقدموا لوظائف.
الشركات الخاصة عموماً والشركات المحترمة مفيهاش حاجة اسمها واسطة ، فيها حاجة إسمها إنترفيو وإختبارات ، ودي اللي بتفرق فيها زي ما قولتلك كفائتك اللي هتكتسبها بنفسك بعيداً عن اللي بتدرسه في الكلية.
وبعدين مش أول ما تتخرج هتشتغل في شركة زي جوجل أو مايكروسوفت ، إنت بتبدأ بشركة أقل وبعد كدة بتتقدم لإختبارات جوجل ومايكروسوفت هما بيعملوا اختبارات كل سنه ، المرتبات في المجال دة بتكون كويسة لو هتشتغل جوه مصر في شركة متوسطة هيكون مرتبك في بداية شغلك 5000 جنية ، طبعاً بتزيد مع مرور الوقت ، برة مصر بقي في أوروبا لو ربنا كرمك واشتغلت في شركة كبيرة مرتبك في بدايته هيكون في معدل 25000 جنية ويزيد برضة مع مرور الوقت.
طبعاً المجال برضة ليه شغل في دول الخليج زي السعودية .... إلخ ، بس نصيحة سيبك من الدول العربية في الشغل ، إبدأ شغلك في مصر واتقدم للشركات العالمية اللي بيبقي ليها فروع في القرية الذكية ، وهيكون ليك فرصة أفضل في السفر لأوروبا.
مش هقولك سهل تلاقي شغل ، أى مجال دلوقتي مش سهل أى حد يلاقي فيه شغل حتي هندسة بترول ، بس فكرة الشغل بتعتمد علي قدراتك ومهاراتك ، لإن الشركة عاوزه حد يكون فاهم ، خلي بالك الشركات مش بتبص لتقديرك في الكلية ، الشركات بتعملك إختبارات.
ممكن انتا تكون جايب جيد وتشتغل في الشركة ، وواحد زميلك يكون جايب امتياز والأول علي الدفعة وميشتغلش ، وأهم حاجة زي ما قولتلك وهكرر متعتمدش علي منهج الكلية اللي بتدرسة لازم تقرأ كتب برمجة بعيداً عن الكلية وتنمي نفسك بنفسك.
|