[THE CodeR]

السلام عليكم

كل عام وانتم بخير ، رمضان مبارك عليكم إن شاء الله

انا كتبت الموضوع ده بدافع إنساني بحت ، عشان محدش يقع في الخطأ الشنيع اللي وقعت فيه

ويدوق تجربة مريرة زي اللي انا دقتها

وكان خطأها الأول والأخير : التنسيق ، وحكايتي كالآتي :

السنة اللي فاتت ، أنا كنت علمي رياضة وجبت مجموع 386.5

كنت عايز أدخل هندسة ، بس الأمل أصبح ضعيف إن مكانش معدوم

في التنسيق بقى : كتبت كل كليات هندسة في الأول إلا كلية واحدة : هندسة إلكترونيات منوف !

قلت لاهلي : دي تخصص مش عايزه ، جامعة فريدة مينفعش احول منها ، ودي آخر كلية ممكن أفكر اروحها في كليات مصر كلها

لم أضع كلية حاسبات ومعلومات لاني مكنتش عايزها ، حطيت كلية علوم بعدها

المهم النتيجة طلعت واجتلي كلية علوم القاهرة (أنا من القاهرة)

قلت الحمد لله خير وبركة انا بحب كلية علوم برضه

المهم شفت تنسيق الكليات فلقيت : هندسة الكترونيات منوف - 386.5

بعد ما أهلي عرفوا ، بدأ الشد والجذب والضغط والنفخ ، بالإضافة إلى غسيل الدماغ واسلوب الاقناع من طرف أبويا

الخلاصة إني حوّلت هندسة منوف وتحويلي اتقبل

تخيّلوا معايا : تصحي كل يوم الفجر ، تصلي الفجر وتجهّز حاجتك وتنزل الساعة 6 أو 6.15 بالكتير

تركب القطار ، توصل الكلية بعد ساعتين ونصف من خروجك من بيتك

مش بتلحق محاضرة 9 من أولها أبداً ، وأحيان كتير الباب بيتقفل ومش بتعرف تدخل

تخلّص محاضراتك الساعة 3 أو 4.30 ، تروّح في قطار 5.30 (القطار الوحيد بعدها ) توصل بيتك الساعة 8 أو 7.30 على أفضل تقدير

خمس ساعات يومياً في المواصلات بس !

بعد السفر ده كله لازم تستريح

يادوب تفتح الكمبيوتر ساعة تكون فرفرت ، تنام وتصحى لتاني يوم الفجر

مكانش في مجال للمذاكرة ، مكانش في مجال لاي نشاط في الحياة

أغلب الأيام مكنتش بنام كويس ، خصوصاً لو كنت مضطر انزل اجيب حاجة بعد رجوعي

كانت سنة صعبة جداً ، محدش يسأل جبت تقديرات ازاي ، تقديري العام حتى الآن جيد مرتفع

والسبب في كل اللي حصل ده : إنّي كنت عنيد

فكّر كويس ، متركبش دماغك في أي هوى من أهواء نفسك ، هدفك رقم واحد قدّام عينك (قدّام كلمة عربية فصيحة)

إدخل الكلية اللي بتحبها ، أو اختار أي سكة تقرّبك منها ، اسمع كلام أهلك فيما لا يتعارض بالكامل مع هدفك

وربنا يوفقكم جميعاً