آه يا زمن
آه يا زمن يا قاسى بالمشوار
ليه ضحكتك أشبه بضحكة نار
ليه بسمتك قاسية ما فيها حنين
والدمع من عينك فرحك وغسل العين
ليه يا زمن تغدر بأهلى وناسى
واصحابى واحبابى فاكر زمان مش ناسى
وليه كمان خليت أحبة تخون
عشرة ومحبة وقلب كان مأمون
والظلم باين فى العيون والناس
رافضة تبص عليه لو حتى بالإحساس
طب ليه تاخدنى معاك لقصر كبير
وتقول بنيته بمودة وحب كبير
واصحى ألاقى القصر كان عشة
ويطير ميرجعش وكأنه كان قشة
تغدر بى ليه وانا كنت فى يوم حبيب
ولا المحبة بقت قضية وعيب
لو كنت أعرف كل ده هيكون
لكنت أتعلم اخون ازاى واكون
زى الأحبة أحب يوم فى الدهر
والباقى يعيشوه معايا ظلم وقهر
طب ليه تعشمنى معاك بكل الخير
وافتح عيونى القاه قدامى زى الطير
أمد إيدى واحن يقولى مش ليكى
أنا طير غريب وخطفت اللقمة من فيكى
وهاطير بعيد وأحط فى إيد ما تستاهل
اصل الزمن غدار لو اخالفه اتاكل
ليه يا زمن تحرمنى ابويا وعمى
واخوالى واخواتى ومااقدر اصبر امى
وجراحى غايرة فى قلبى ده ومالها
دوا وعلاج غير قطع اوصالها
اجرحنى سيل قد ما يكفى من دمى
ورجعلى اختى وأبويا وفرحة امى
|