[lally adel]

المشاركة الأصلية كتبت بواسطة مغفرة طارق

وانتى طيبة يا دكتور
بجد ربنا يكرمك على الافاده الرهيبة اللى بنستفيدها منك
بمناسبة العيد فهاخد عيديتى بسؤالين لولبين
الاحياء ازاى تذاكر كويس يعنى السنادى تقريبا بلاقى الدرس كله عاوز يتحفظ من اوله لاخره
فبفهمه جدا واحفظه تمام بس اما اجى احل احيانا الاقى سؤال انا فهماه وعارفه اجابته بس مش عارفه عاوز اكتبله ايه بالظبط من المعلومات فعاوزة اعرف كنتى بتذاكريها ازاى امن اول ما تخديها فى يومها لحد الحصة اللى بعدها انا السنه اللى فاتت كنت برجع من الدرس اقرا الدرس احل الواجب والسؤال اللى معرفوش اجيب اجابته من الكتاب واحفظه وجبت 19,5 بس خايفه اعمل كده السنادى لانى لو حليت الكتاب open book كده مش هلاقى اسئله تقف قدامى او اختبر نفسى فيها انا معايا كتاب الامتحان اجيب حاجة تانى ولا تمام كده
لسؤال التانى ازاى المراجعة
انا مش عارفة ازاى اراجع (فى اى ماده ) يعنى امسك الدرس اقراه تانى ولا احل عليه من كتاب غير اللى بحل فيه علطول ولا ايه بالظبط
سورى يا دكتور اسئلتى ذكية شويه وحطمت الرقم القياسى فى الرغى هههههههه

لو هتتكلمى ع الرغى ف انتى كدة بتشتميني .. لان انا عملت ارقام قياسية فيه و حطمطها كمان ..و كل اللى ف المنتدى هنا يشهد

شوفى يا ستى ..
بالنسبة للاحياء .. انتى ترجعى من الدرس تشوفى ان كنتى هتذاكرى الجديد اللى خدتيه دة ف نفس اليوم و لا اليوم اللى بعده .. حاولى ما تاخريهوش اوى عشان يبقى لسه الكلام طازة ف دماغك و كمان عشان ما تتزنقيش قبل معاد الحصة اللى بعد كدة .. تقعدى تمسكى الكتاب اللى هو المصدر اللى انتى بتذاكرى منه و اللى متاكدة انه مطابق لكتاب المدرسة .. تفصصى الدرس حتة حتة .. تقري الجزئية دى و تشرحيها لنفسك و تفهمى هو عايز يقول ايه منها .. طل لو حب يجيب اسئلة ف الحتة دى يقول ايه .. اه يقول مثلا علل كذا كذا كذا و كدة هتبقى الاجابة كذا كذا كذا .. الكلام دة تكتبيه ف الورق اللى هتذاكرى فيه .. تكتبي السؤال باجابته سواء بقى قدرتى تكتبي الاجابة دى من ذاكرتك او نقلتيها م الكتاب مش مشكلة .. المهم انك تبقى بتكتبي الاجابة اللى هى النموذجية .. و تفضلى على كدة لحد اخر الدرس .. تحاولى بقى كل موضوع تجمعيه مع بعضه .. يعنى مثلا عندك التكاثر ف الزهرة بعد ما تخلصيه تقولى اه يبقى كدة التكاثر دة بيتم على خطوات الخطوة الاولى كذا كذا وبيحصل فيها واحد اتنين تلاتة .. و التانية كذا .. و هكذا .. بحيث انك بعد ما تخلصى الخطوات كلها تبقى مراجعه علي كل الخطوات و انتى قاعدة عشان تفكرى نفسك يعنى ..
بعد ما تخلصى الدرس على كدة تبداى حل .. عاااادى جدا انك هتلاقى نفسك فى حاجات بتحليها غلط و حاجات بتفتحى فيها كتاب الشرح و حاجات نسيتيها .. مش مشكلة خاااالص .. المهم انك لو كنتى مثلا ناسية اجابة السؤال دة و فتحتى الكتاب و نقلتيها تراجعى ع الاجابة دى تانى و تحاولى تكتبيها لوحدك من غير ما تبصى ف الكتاب عشان تتاكدى انها كدة ثبتت ..
الاسئلة اللى انتى تبقى عارفة اجابتها بس مش عارفة تصيغيها ازاى دى تسالى فيها مدرسك لو ملهاش اجابة واضحة ف الكتاب و بالخبرة و كتر الحل هتقدرى تلمى الاسئلة دى و تحصريها و تعرفى لما يسالنى على كذا يبقى هو عايزنى اتكلم عن الحتة الفلانية ..
بعد ما تاخدى مثلا تلات اربع دروس كدة هتبصى تلاقى نفسك بداتى تنسي اللى انتى ذاكرتيه ف الاول .. دة عااادى جداااا .. اول مذاكرة دى بتبقى الفرشة اللى انتى بتفرشيها بس مش اكتر .. البنا كله بقى و التثبيت بيبقى بالمراجعه ..

المراجعه ازاى .. مبدئيا كدة الاولوية للحاجة الجديدة اللى هتتذاكر .. يعنى ما يبقاش انتى عليكي مذاكرة عربي متاخرة و تقعدى تراجعيلي حاجات قديمة م الفيزيا .. لا خلصى مذاكرة الجديد الاول و الحل عليه و بعدين راجعى ..
تراجعى ازاى .. ف الفترة دى اللى انتى بتذاكرى فيها و مشغولة بستين حاجة غير مراجعه القديم يبقى كفاية اووى ان انتى تقري الدرس كدة قراءة متانية بحيث انك تفتكرى بس التفاصيل اللى فيه و بعدين تبداى تحلى من مصدر تانى غير اللى انتى كنتى بتحلى منه بعد المذاكرة .. حتى لو و انتى بتحلى كنتى فاتحة كتاب الشرح قدامك مش مشكلة .. اهو حتى و انتى بتنقلى كدة من كتاب الشرح دة ف حد ذاته بيفكرك بمعلومات ممكن تكون كانت واقعه منك او نسيتيها بسبب تراكم المذاكرة ..
بعد كدة بقى لما تخلصى المنهج ان شاء الله مش هيبقى وراكى غير المراجعه اساسا ف هيبقى ليها نظام تانى مختلف .. لما يجي وقتها ان شاء الله نبقى نتكلم فيه ..
اى اسئلة تانية انا ف الخدمة

ربنا يعينكو