[مسلمة متفائلة]

وعليكم السلام ورحمة الله

أفضل طريقة عشان تنجز اللي عليك
تحدد إنت هتعمل إيه النهارده .. وتستعين بالله وتصمم إنك تخلصه

يعني مثلًا في الرياضة هتحل تمارين التباديل والتوافيق كلها النهارده .. فتاخد قرار إنك هتخلصها
أو حتى تبدأ بجزء كبير من العمل اللي عليك .. وبعد كده تعمل اللي أنت عايزه

لأن الإنسان لما بيحس إنه أنجز شيء معين المفروض إنه يعمله
ده بيديله دافع إنه يكمل ..

حتى لو هتفتح الكمبيوتر بعد كده ..
هتحس إنك إنجزت شيء وبترفه عنه نفسك فمش هتبقى شايل هم المذاكرة

وإياك تفتح الكمبيوتر وإنت مش داخل عشان هدف
يعني ماتقعدش تقلب كده وخلاص .. ده أكتر شيء بيضيع الوقت

وابعد عن الحاجات اللي مالهاش لازمة في الوقت ده .. زي الفيس وغيره
أدخل شوف حاجة مفيدة .. مش لازم تكون في الدراسة .. لكن حاجة تنفعك عمومًا

واللي بيلم الكلام اللي فات ده كله
إنك تحافظ على وقتك .. وقتك هو عمرك

افتكر مثلًا إن هيجي اليوم اللي هتمتحن فيه ومش هتلاقي وقت تذاكر
يبقى ليه أضيع وقتي وأنا قدامي أهو الحمد لله السنة من أولها عشان أذاكر؟
وليه أضيع 5 أو 6 ساعات قدام الكمبيوتر ..و أنا عارف إني هكون في أشد الحاجة ليهم ليلة الامتحان؟

ده مش معناه إني أضغط على نفسي أوي في المذاكرة من أول السنة .. لدرجة إني أمل منها
لكن أهم حاجة إن أعرف أنا بعمل إيه وأحافظ على وقتي كويس ..

وبالنسبة للإنجليزي .. فهو مش بيعتمد على المنهج أكتر ما بيعتمد الفهم
وحفظ الكلمات طبعًا ده عامل كبير جدًا .. هو حل كتير وتدريب مش أكتر

وفي الآخر افتكر دايمًا حديث الرسول -صلى الله عليه وسلم- :

"المؤمن القوي خير وأحب إلى الله من المؤمن الضعيف وفي كلٍ خير،
احرص على ما ينفعك، واستعن بالله، ولا تعجز،
وإن أصابك شيء فلا تقل: لو أني فعلت كان كذا وكذا، ولكن قل: قدر الله وما شاء فعل،
فإن لو تفتح عمل الشيطان" رواه مسلم.

ويا ريت تكتبه عندك وتعلقه عشان تفتكره دايمًا

وفقكم الله