السلام عليكم ورحمة الله وبركاته
ازيكوا يا جماعه عاملين ايه ؟
اولا بشكر الاخت سندريلا على موضوعها
ثانيا انا اشتركت فى المنتدي دة علشان موضوع الاخت سندريلا والقصص بتقولها اللى ان شاء الله هتفدنى شخصيا فى مسئلة بالنسبه ليا انتقام
وانا شفت ان هنا بعض الاخوه مش مصدقين الكلام دة ومفكرينه قصص خياليه ومسليه لا انا بقولكم صدقوا
لان انا شخص من ضحايا القصر ده والضحيه الاكبر وفاة اعز اصحابى بسبب القصر والله يا جماعه دي الحقيقه
ثالثا اعرفكم بنفسي انا اسمى فؤاد سنى 21 سنه فى اخر سنه ليا فى كلية فنون جميلة جامعة الاسكندريه بس مقيم فى المهندسين شارع شهاب
ومكنتش عايش فى مصر كنت فى ايطاليا ومولود هناك والدي مصري و والدتى ايطاليه وتوفت ( ربنا يرحمها ) ونزلت مصر من حوالى 4 سنين
علشان اخد الكليه من مصر وانا كنت هموت وانزل مصر كنت بكلم اصحاب ليا على النت من مصر واعز اصحابي دول هما اتنين واحد اسمه زياد وواحد اسمه تامر
انا هقولكم بعض احداثن من قصتنا لكن بلاش التفاصيل علشان انا مش عايز افتكر والله
وبدايتة القصه دي انى اول ما انزلت مصر لقيت اصحابي مستنينى فى المطار وهما زياد وتامر والاتنين ولاد عم كنت اتعرفت عليهم وانا فى ايطاليا من على النت
وكنا بنتكلم من حوالى سنتين المهم انا نزلت على شقتنا اللى فى المهندسين ونضفناها وكدة واتفقنا انهم يقعدوا معايا طول النهار ويمشوا بليل لانهم مش راضين يناموا معايا فى الشقه علشان اهلهم
المهم نزلنا فى يوم علشان اشتري عربيه علشان هحتاجها ونزلنا واشتريت واحده وكنا بنتمشي بيها بليل وعدينا من على قصر البارون انا وقفت عالطول اول ماشفته من شكله
وكانت الساعه تقريبا 1:30 بليل اصحابى قالوا وقفت ليه سالتهم عليه بس هما كانوا يعرفوه اسم بس لكن مش يعرفوا تفاصيل انا شدنى اوى القصر ده قولتلهم يلا ندخله
وفعلا نزلنا من العربيه ورحنا علشان ندخل لقينا حراصه وقالوا ممنوع الدخول وكدة وسالت ليه طبعا قالوا حاجات غريبه عنه انا مصدقتش طبعا وقولت انهم بيقولوا اى كلام علشان مندخلش
المهم الموضوع شدني جدا وطبعا الكمبيوتر والحاجات بتاعتي سبتها فى ايطاليا يعني مكنش عندي نت ولا حاجه وقبل ما نرجع البيت قولت لاصحابي انى لازم اشتري لاب توب دلوقتى حالا
قالولى لية وكدة قولتلهم لازم ادخل على النت بكتير اوى بكرة لحد ما تعملولى اشتراك على النت بكره الصبح قالوا ماشي المهم جيبت واحد و وصلت النت وكل حاجه
وبدات طول ما انا فى البيت قاعد على الكمبيوتر بدور على معلومات على النت عن القصر ده واعرف عنه كل حاجه وشدنى القصر ده جدا مع انى مكنتش مصدق اى كلام من ده
المهم انا قولت الاصحابى ندخل القصر ده من ورا الحراصه اللى عليه لو حتى هنطلع من على السور وحاولت اقنعهم وزياد عرف معلومات عن القصر ده وانه فى جن وكدة
وكان موافق ومتشوق انه يدخل معايا لكن تامر كان خايف وكان رافض قولتلهم لو مش هتيجوا معايا هروح لوحدي المهم اتفقنا اننا هنروح كلنا لانهم خافوا عليا انى اروح لوحدي
واتفقنا اننا نروح بليل بعد ما الحراص يناموا وخرجنا من البيت الساعه 12 تقريبا ووصلنا و وقفت العربيه بعيد علشان مفيش حد ياخد باله او حاجه
رحنا ومشينا من قدام القصر مالقناش اى حاجه لا حراص ولا حاجه قولتلهم نختصر ونطلع من فوق السور وخلاص وفعلا طلعنا من فوق السور بس بصراحه والله مكنش فى كلاب
المهم نزلنا من على السور داخل جنينة القصر لقينا اتنين حراص بيجروا من القصر خارجين بره خالص تامر اترعب قال انا خارج تانى المهم قولناله استنى واقنعناه
قولتلهم ان دي فرصه كويسه اوى انهم خرجوا علشان نبقي براحتنا ودخلنا القصر قولتلهم ناخده بالتفصيل كده وكنت انا ماشي فى الاول وبعدين زياد و تامر
انا كنت بقف عند كل حاجه اشوفها وادقق فيها لكن هما كانوا ماشين وخلاص وكان واضح عليهم الخوف بس انا والله مكنتش خايف انا كنت مستمتع جدا جدا
المهم انا فضلت ماشي وطلعت فى الدور التانى وبصيت ورايا ملقتش ولا تامر ولا زياد نزلت تانى لقيتهم واقفين تحت ومسكين فى بعض كده والخوف ماليهم
رحتلهم جري وسالت فى ايه قالوا شفنا واحد مشي بسرعه رهيبه ومش واضح هو اية بالظبط قولتلهم انسوا دة بيتهيالكم بس قالوا والله احنا متاكدين قولتلهم انسوا وخليكوا ورايا
وطلعنا فى الدور الثاني بصراحه كان منظره مخيف اكتر من تحت لان كان فى دم كتير وحاجات شكلها يخوف زي تماثيل وكده
المهم انا لقيت حاجات مكسره زي زجاج او مرايه وعليهم دم وجدران عليها دم وكلمات واشكال وحاجات غريبه انا حطيت ايدي على دم على الحطيه
ولقيته ناشف وخشن جدا جدا وحسيت ان لدرجة لو ضغط عليه ممكن يجرح ايدي فمشيت قدام شويه كدة وزياد ببص فى مكان وتامر فى مكان واقل من دقيقه لقيت تامر
بيورينى دم على ايده قولتله منين قالى من الجدار ده قولتله ازاى وانا لقيت الدم ناشف قالى والله منه ورجعت تانى حطيت ايدي لقيته ناشف ولقيت تامر الخوف وضح عليه جدا
قولتله ممكن من مكان تانى بس انت مخدتش بالك سكت وانا متاكد انه مش مقتنع بكلامي ومشيت شويه لقيت حمام كله دم وده انا سمعت عنه انه اتقل فيه واحد بس بصراحه والله ملقتش حاجه
بس انا عرفت انه هو الحمام لان انا كنت قرات ان البانيو بتاعه عليه دم وهو فعلا البانيو بتاعه كان عليه دم الهم كلنا اتجمعنا كدة علشان نطلع فوق كمان بس قبل ما نطلع
سمعنا صوت خطوات لقيت اتنين ركبوا على كتفى ازاى مش عارف وهما طبعا زياد وتامر رجعت بيهم لورا شويه لاننا كنا قريبين من السلم ورجعنا ورا عمود
قولتلهم ممكن يكون حد من الحرص حس بينا وطلع يشوف بس بصراحه صوت الخطوات دي كانت اكنها صوت خطوات فيل كانت جامده جدا وعالية جدا
اصحابي سكتوا خالص بس فضلوا ماسكين فى كتفي رحت منور مره واحده تجاه السلم فوق وتحت ملقتش حاجه وصوت الخطوات سكت تامر قال انا همشي
قولتله انا وزياد استنى لكنه كان ماشي بسرعه وراح واقع قريب من السلم وسمعنا اصوات خبط جامد واصوات حاجات بتتكسر واحاجت غريبه اوى قالى يلا نمشي يلا وحسيت ان الرهبه مسكته انا خوفت عليه بصراحه قولتلهم طيب يلا نمشي
واحنا نازلين من على السلم موبايلى رن واتخضينا مع العلم ان موبايلى رنته دعاء اسلامى طلعت الموبايل اشوف مين لقيت الموبايل وقع مني وفضل الاتصال موجود
بس الدعاء سكت و واطيت اجيبه حسيت ان فى حاجه مشيت بسرعه جدا بس والله مش عارف ده كان ايه او شكله ايه واصحابي ماشفوش حاجه لانهم لو شافوا كانوا هيقولوا ليا عالطول
بس انا سكت مقلتش لهم حاجه علشان هما مش ناقصين خوف وجيت ابص فى الموبايل لقيت الاتصال من واحد صاحبي فى ايطاليا ولقيت الموبايل قفل خالص لوحده
سكت قولتلهم يلا ننزل قالوا يلا ونزلنا وخرجنا من القصر ورجعنا البيت لقينا حاجه غريبه اوى لقينا مكتوب على تشيرت تامر كلام ايطالي وهو
fronte la selezione come per la vita o la morte
ده معناه ( امامك الاختيار اما الحياة او الموت ) فانا اول واحد شاف الكلام اللى مكتوب على تشيرت تامر وسكت وبعدين تامر شافه لما راح الحمام يغسل ايده من الدم اللى كان على ايده
وشويه لقيته رجع بيجري وبيسالنى انا وزياد ايه ده قولتلهم مش عارف ده شكله مش انجليزي وزياد قال مش عارف راح تامر مغير التشيرت بسرعه
وبعدين كل حاجه بقت عادي وناموا معايا فى الشقه فى اليوم ده وبعد حوالى شهور بدا تامر احواله تتغير ويقول انه بيشوف حاجات وفضلنا نضحك ونهزر على كلامه
وبعد اقل من اسبوع تامر طلب مننا نروح القصر تانى وسالناه ليه قال كدة ومعرفناش السبب ورحنا القصر وبردة كان فى حاجات غريبه واصوات غريبه وتامر بقي عايز يقعد اكبر فترة ممكنه فى القصر
وبنرجع بيكون تامر حالته احسن من الاول وبعد فتره من رجوعنا نلاقى تامر حالته بقت مش كويسه ويطلب مننا نروح القصر ونروح ويرجع بيكون كويس
استغربنا طبعا انا وزياد بس مارضناش نتقل على تامر ولا حاجة علشان منخضوش على نفسه وسكتنا وابتدت الدراسه وانشغلنا شويه بالدراسه بس كنا بنروح القصر لما تامر يطلب
بس بعد كل فتره واوقات كنا مش بنعرف ندخل المهم فضلنا على الحال ده سنه وفى اجازة الصيف بدا تامر يروح القصر لوحده ومره زياد كان معايا وبنتصل بيه علشان نخرج
رد وقال انه فى القصر قاعد هناك بيشوف حاجات زياد قال لازم نسال ونشوف ايه الحكاية دي وسالنا تامر قال مفيش حاجه انا بحب اروح اشوف المناظر اللى هناك
وطبعا مصدقناش لان تامر ده كان بيخاف جدا واحنا هناك حتي لما الهوا بيعمل صوت زياد قالى انه هيسال اى شيخ وسال فعلا شيخ وحكاله كل حاجه والشيخ قاله
ان الشياطين اتملكت من صاحبك وممكن يكون ركبه جن وهو اللى بيحركه فالشيخ قال سبوه على راحته وهو فترة الجن ده هيخرج منه وقاله متفضلوش تضغطوا عليه احنا قلقنا جدا عليه وابتدي خوفنا عليه يزيد
وفضلنا على الحال ده اكتر من سنه ونص او سنتين ومفيش اى تغير وفى مره ايام الامتحانات اهل تامر اتخانقوا معاه علشان مش بيذاكر و والده حبسه فى البيت علشان يذاكر
وفضل تامر يتصل بينا انا وزياد علشان نروح ناخده ونروح القصر ورحنا البيت له اهله رفضوا اكتر من مره اننا نقابله وبعدها باقل من اسبوعين اتصل والد تامر
بزياد وقاله ان تامر مات وزياد اتصل بيا وعرفني رحنا هناك البيت عندهم واحنا مش مصدقين وبعد ما وصلنا دخلنا على تامر لقناه خلاص اتوفى اتصدمنا صدمه كبيرة جدا
وعرفنا من والده انه رمى نفسه من شباك غرفته والغريب واحنا واقفين انا وزياد وهما بيغسلوه ان مكتوب على بطنه نفس الجمله اللى كانت على التشيرت لما رجعنا
fronte la selezione come per la vita o la morte من القصر اول مره اللى هى
(معناها امامك الخيار اما الحياة اما الموت )
وزياد اغمى عليه فى الوقت ده وانا حالتى النفسيه تعبت والحمدلله بقينا كويسين عن الاول دلوقتى واقسمنا بالله وحلفنى على المصحف وقررانا انا وزياد يا نموت او ننتقم لتامر والله العظيم بجد يا جماعه
واحنا حاليا بندور ونبحث عن كل حاجه نقدر ناخدها سلاح لنا وسالنا شيوخ ومناجمين علشان نعرف ايه نقط الضعف ولقينا كتير اوى من نقط الضعف وعرفنا انهم مخلوقات ضعيفه جدا جدا بس اللى يفهمها من الاول
وان شاء الله ربنا يوفقنا ونقدر ننتقم لتامر
(واسالكم الدعاء لتامر بالرحمه والمغفره وبالتوفيق لنا للانتقام له )
و والله العظيم يا شباب القصه دي حقيقه ومفيش فيها ولا كلمه زياده انا حكيتها لكم علشان تصدقوا ان القصص بتاع الاخت سندريلا حقيقه
وان شاء الله احاول ادخل هنا تانى علشان لو اى حد منكم عنده استفسار ارد عليه ولو اى حد عنده معلومه تفدنا ياريت ميبخلش علينا بيها
والسلام عليكم ورحمة الله وبركاته