قصيدة مدوية للثانوية الغبية
قاعد وسط الكتب مهموم
كفاية كدة يبنى و قوم
بقالك من الفسح سنة محروم
دى الدنيا كوم و صحتك كوم
و الامتحانات حتيجى زى المرسوم
ولو حتى صعبوها مش حنلوم
انت ذاكرت كويس ع العموم
و الدروس الخصوصية بيعتنا الهدوم
بس انت ايه ذمبك يا مظلوم
دة حال الكل و دة المقسوم
و اللى حصل فى التفاضل مش حيدوم
ولا حيتكرر فى باقى العلوم
يلا قوم خد كفايتك من النوم
بكرة الامتحان و دة لزوم
على الكل سارى قضا محتوم
داخل اللجنة لا بيا ولا عليا
ألاقى مراقب بيبحلق فيا
و التخت كلها رجليها مصدية
وشوش تهبط أعلى معنوية
دعيت و قلت يا عالم النية
ييجى الامتحان أسهل من المية
و جه الامتحان بأسئلة لولبية
دى فيزيا دى ولا طاقة نووية
فين أرشميدس و قانون الجاذبية
طب فين المقرر و العلاقات الرياضية
بلاش الاجبارى و أروح للاختيارية
لقيت حتة صعبة فى كل جزئية
طب أروح أحسن للرسمة البيانية
اتحولت فيها دى أفقية ولا رأسية
عشمونا و قالوا الامتحان حييجى هدية
هدية ايه دة قمبلة ذرية
و اللى حطه أكيد عنده حالة نفسية
عايز يقيس قدراتنا الابداعية
قال و كنت بحلم بدرجة نهائية
و أخش بعدها أجدعها كلية
اخرتى سريح فى اشارات مرورية
خفت أكون لوحدى بصيت حوليا
واحد بيلطم زى الولية
و التانى قتل نفسه بطلقة مدوية
و متعدش المحاولات الانتحارية
اه يا جبابرة يا عالم مفترية
عايزين تشغلوا الجامعات الخصوصية
و يكش تولع بقى الحكومية
طب ذمبنا احنا ايه فى الليلة دية
و ترجعوا تسألونا عن روحنا الوطنية
اسألوا الوزير و قراراته العنترية
اللى قتلت جوانا أى انتمائية
سيبت كراسة الاجابات مهوية
خرجت لقيت أمى واقفة مستنية
هه...عملت ايه يا نور عينيا؟
ادعيها و النبى ياما و انتى متوضية
قولى: يخرب بيت امتحانات الثانوية
هذة القصيدة كتيبتها الطالبة مى ونشرت بجريدة الاخبار
|