اعتقد ان الغش ظاهرة لن تنتهى لانها اصبحت جزء من ثقافة مجتمع
واصبحت طبع اصيل للطلاب واحيانا يعتبرها البعض حق من حقوقه المكتسبة رغم انف المعلمين
وطبعا اسباب الغش معروفة للجميع منها معاناة الطالب مع المواد الدراسية وكرهه للدراسة وتهاون المراقبين داخل اللجان الا من رحم ربى وحتى لو مراقب عنده ضمير بيتمنع من دخول اللجان فى يوم المواد الصعبة عشان الامور تمشى داخل اللجنة
كمان الاسرة حاليا اتغيرت فى طريقة التربية كان زمان التربية تقوم منذ الصغر على كيفية الاعتماد على النفس ورفض النجاح دون تعب أو مجهود لكن حاليا ومع تغير رتم الحياة اصبحت تقوم على مشى حالك وعدم الصدق والامانة الاهم عند الاهل حاليا الشطارة والفهلوة والنجاح الرخيص
كمان تجارب الطلاب السيئة مع الدروس الخصوصية اللى بتقوم ع الحفظ والتلقين دون الفهم سبب كبير فى عدم استيعاب
الطلاب بطريقة كافية ويتجهوا للغش والطامة الكبرى المعلم وتعمد فقدان هيبته امام طلابه لجذبهم للدروس واصبح حاليا الطالب يتعامل مع المعلم وكانه واحد صاحبه ومن سنه مع ان للمعلم احترامه الكبير لانه محمور العملية التعليمة بس بقى مش فاكر النقطة دى مع مواجهته المستمرة للبحث عن حقوقه مع الوزارة
المحزن فى الامر ان الغش اصبح جزء من العملية التعليمية واصبح يقبل عليه الجميع وليس فقط الطلاب الفاشلون
والاسوأ ان الاب والام يشجعون ابنائهم ع الغش بمقولة لو معرفتش حاجة اتصرف لازم تنجح
وللاسف شئنا ام ابينا الغش بيخلق جيل فاشل وكاذب ويستمر بمواصلة الغش الا ان نجده يوما القاضى والطبيب والمهندس اللى بيبنى مصر يعنى ببساطة لن تتقدم مصر بمثل هذه العقليات