ان شاء الله انا هقدم هذا النص ...شعر عامي
ايمن عباس هاشم
.............................
اكتمال الغياب
شعر / أيمن عباس
عشقي ليكي
برواز قديم او صورة
ولسه الحياة اسطورة
بتمرح في شوارعك المسحورة
طومان باي ومماليكك المكسورة
علي باب زويله مترحلين
و حلمي اللي محني ...
يعافر عشانك
في رمل السنيين
و كفي اللي شالك
وحلمك كان لسه جنيين
وشاهد وشهدة علينا الخلايق
اني بحبك
في طلة ترام اسكندرية القديم
في فيلم ابيض واسود لاسماعيل ياسين
في منف وطيبة ...
في ليل القاهرة الاسر / الباكي /المستكين
في احلام الخلايق الطيبيين
في كل مينا ونجع
و عزبة البرج والصيادين
في كل احمس ونارمر
وعابر عيونك سبيل
في كل طلقة ميلاد
لنيلك بالحنيين
في كل زرعة غنا
يخضر عودك هنا
واحنا قصادك متجمعين
في حضن ابويا وأمي ..
في ضحكة محمد ابني
في ليل الغربة الحزين
في دمعة (الجدة فهيمة)اللي غابت ونزفت ......
بين سطور القصيدة وفاتت في دمي الرياح والهشيم
في نسمة طفولة بتكبر ونكبر
شجر في الخريف ..ونسقط ورق بلا أي زيف
بحبك قصادي تضمي ولادي
تعاندي الظروف
تلمي اللي فاضل في ودي وهمي
وحزني اللي طالع في نني وفني
سنابل غيطان.. حواري و رغام
بحبك في ريحة يناير
بشاير تهز الشجر والحروف
وبرد الشتا في حصاني الخشب
بيصهل من غير أي خوف
بحبك في لحظات الحمي...والغياب
وخيالات صديق مرجعش من السفر
صحي م الموت فجأة ....يطير
يرسمني في مرايته أقواس قزح
وزقزقات عصافير
تشبه صدي روحي ,,وزهقي
تشبهني ...في ارتحال الفصول
... في اكتمال الغياب..
في احتجاب القمر
في عشق الزهور
بحبك
في نيلي اللي راسم بيوت
في لسان قصيدتي اللي رافض
يموت
في دموع حبيبتي اللي غابت ما سابت
غير وتر مكبوت
بحبك في
في الغياب
في حبات المطر
من فوق السحاب
لما
بتنقر ع السكوت
دم وبكي مسفوح
بحبك وانتي
خنقاني
وانا.... بتعكز عليكي لحد الموت
ولحد ضوافرك ما تغرس في لحمي الحي
زراق التوت
وتبعتر فيا المعاني و الاسئلة
وتوه ملامحك ....في السفر
والدروب
بحبك وانتي حلم طروب
وضل وسكن أوهن
من خيط عنكبوت
بحبك وانتي ورق الخريف ...
وعمري اللي بيخلص في النزيف
زيف وزفة وكدابين
نداهين ومنذروين للخوف اللي فاتح للحنيين
سربين زهق ..مدموغين بشهيق محموم
في احتباس الندي
في صرخة طفل يتيم
تايه وسط الذهول
يرسم عمره العجول ...
فراشات بتطير
وزقزقات عصافير
تشبه صدي روحي ,,وزهقي
تشبهني ...في ارتحال الفصول
... في اكتمال الغياب..
في احتجاب القمر
في عشق الزهور
|