الأول
لازم تعرف راسك من رجليك يعنى تكتب كل المواد فى ورقة كده
وتحت كل مادة فاضلك فيها ايه ما اتذاكرش
من القديم وانسى الجديد اللى لسه هيتاخد خالص عشان لو فكرت فيه دلوقتى هتتعب وهتتعقد ومش هتلاحق
واعمل ورقة تانية فيها الجديد اللى هتاخده وأنت مش هتذاكره دلوقتى خالص
عشان تبقى ماشى بنظام وعارف
أنت مذاكر ايه وسايب ايه
ثانياً
ابدأ وزع المواد على الوقت اللى فاضلك بالاسابيع
يعنى مثلا قول الاسبوع ده هاكون انجزت فى مواد كذا وكذا وكذا
هنا يجى سؤال
امشى مادة مادة ولا أنوّع
؟؟؟
أنا من رأيى تنوع عشان حتة الملل ثم لأن ساعات دماغك بتقفل من مادة فيها حفظ مثلاً
فساعتها الأحسن ليك تنقل على مادة فيها حل وتفكير ورياضة مثلاً
أو العكس
المهم
لو ما نوعتش هتوصل للملل وبالتالى معدل انجازك هيبقى بطئ وبكده مش هتلحق تخلص
وأنت محتاج كل ثانية
طيب اثبّت اللى مذاكره قبل كده من المادة بالمراجعة ولا اخد الجديد اللى ما ذاكرتهوش أولى
؟؟؟؟
لأ طبعاً ابدأ بالجديد اللى خدته وما ذاكرتوش لكذا سبب
1- لو اتزنقت ودخل الامتحان القديم ممكن تراجعه بمجرد النظر لومذاكره كويس
وناسيه
ولو مذاكره بس مش كويس هتنجز فيه
بعكس الجديد اللى محتاج مجهود كبير عشان تقدر تذاكره لأول مرة
2- لأن أنت بتبدأ سخن فابدأ بالتقيل عشان لو بدأت بالسهل اللى انت مذاكره قبل كده هتهمد
ولما تيجى للجديد
اللى هو اتقل هتكسل
3-لأنك ممكن تتزنق وما تلحقش تذاكر الجديد وثبتت مذاكرتك للقديم كويس
ودخلت قفلت القديم فى الامتحان
والجديد ما حطيتش فيه قلم طبعا الدكتور عمره ما هيديك على حلك
للجزأ اللى ذاكرته
أكتر من الدرجة المخصصة للجزأ اللى انت حليته
وبكده ممكن تسقط رغم كونك متمكن جداً من الجزأ اللى أنت ذاكرته كويس
ساعتها اقولك يا فرحتى
4-لو اتزنقت وما لحقتش تخلص الجديد ودخلت الامتحان من غير ما تذاكر حاجات
هتتوتر جدا فى الامتحان
وممكن تبوظ الدنيا كلها
أنما لو اتزنقت مع القديم ممكن تقرأه بس وتلخص القوانين وتنجز
5-ممكن لو أنت فقرى شوية ييجى الجزأ اللى أنت ذاكرته صعب جداً وما تعرفش تحط فيه قلم
والجزأ الجديد اللى انت اتزنقت وما لحقتش تخلصه سهل وساعتها
يا حلو هتتظبط
الخلاصة
نظم اللى وراك ونوّع وانت بتذاكر وابدأ بالجديد اللى أول مرة تذاكره
كدة يكون انتهى واتمنى يكون افدكم زى ما افدنى