احكم وانت سجين وحبيس
وفران الليل في القصور محابيس
دا ﻻ عمر السجن بي*** زعيم
وﻻ عمر القصر بيصنع رئيس
احكم وانت ما بين قضبان
وابني في عرشك كمان وكمان
سجانك اصبح ف خوفه سجين
وانت في سجنك بقيت سجان
اسمك ف توب الزعامة اتغزل
وكتبوا قصاده.... زعيم للأزل
قول للي حاولوا عزل التاريخ
اسمك لسه هناك ما اتعزل
والسجن في شرع الكرام سنة
زي المد كدا في التجويد والغُنة
ربك.... مّن بيه على يوسف
وانت كمان ..السجن ليك مِنّة
قصر الرئاسة الجديد مترين
متر في متر شمال ويمين
ياللي حسبتوا الرئاسة قصور
ان الاوان تحسبوا الزنازين
في زمن فيه الزمن عاطل
بيعاند ثورتي قوي ويماطل
مهما حكمتوا عليها بالفشل
حكمكم باطل على باطل
ثورتي وهي ف قلب القفص
تاريخ من فخر التاريخ اقتبس
تحبسوا فيها وﻻ ماتحبسوا
عمر التاريخ ف يوم ماتحبس
ميدان بيسلم رايته للتاني
كل ما يقع يقوم يقف تاني
وقف فيه كل اللي كان متني
وإتنى فيه كل اللي كان تاني
اصل الكرامة ياناس فلسفة
ومعنى ف قاموس العبيد اختفى
ﻻ عمره هاييجي بأمر انتباه
وﻻ عمره هاييجي كمان بالصفا
|