[محمد محمود بدر]

خامس شخصية : عمرو خالد
(صانع الحياة الملهم)
Amr Khaled




ممكن يكون في ناس كتير بتختلف مع دكتور عمرو خالد في بعض الحاجات في الناحية الدينية او الناحية السياسية .. لكن من باب الانصاف مينفعش ننكر فضل الراجل بعد ربنا على جيل كامل من الشباب

عمري ما أنسى أيام ما كان بيقدم برنامج صناع الحياة وكان بيروج دايماً لفكرة اننا لازم نعمل نهضة لبلادنا وان البلد مش هتقوم الا بينا .. كانت والدتي بتقولي (بيقول ايه الراجل ده ؟؟ ) .. كانت اصلا الفكرة غريبة ان حد يتكلم فيها .. يعني ايه نعمل نهضة لبلادنا ويعني ايه احنا نشتغل ونغير ويبقى لينا بصمة ونعمل فرق في الحياة .. رغم ان ثورة 25 يناير ملهاش قائد لكن دكتور عمرو كان من أوائل الناس اللي ابتدت تعلم الناس فكرة الثورة (ممكن تكون مش بمعناها الصريح اللي هو الثورة ضد النظام لكن بمعنى اعمق بكتير وهو الثورة ضد الأفكار السلبية التقليدية والقيود المحبطة وان يكون عندك طموح وامل في التغيير)





في الوقت اللي كان بعض الناس بتنتقد دكتور عمرو انه بيحضرله بنات مش محجبة في دروسه .. كان هو شايف ان البنات المش محجبة دول مش كفرة دول مسلمين زينا زيهم ومن حقهم يسمعوا عن ربنا وعن سيدنا النبي عليه افضل الصلاة والسلام ولو في مسئول حقيقي عن انهم مش محجبات فالمسئول الحقيقي هما الدعاة اللي معرفوش يوصلوا رسالتهم للبنات دي .. وبفضل ربنا كان سبب في ان بنات كتير تتحجب لدرجة ان بيقول ان انتشار الحجاب في سوريا في اخر عشر سنين يرجع سببه لتأثير دروس دكتور عمرو خالد




وفي الوقت اللي كان بعض الناس بتنتقد مظهره وبتقول انه مظهر ميدلش على داعية اسلامي .. كان هو بيشتغل ليل نهار عشان يوصل رسالته لطبقات من الشباب و أماكن مكانش في شيخ او داعية يعرف يدخلها

كان من اوائل الدعاة اللي ابتدوا يرسخوا لمفهوم العمل التطوعي واهميته وان ده جزء من الدين .. مساعدتك للشباب المدمن انهم يبعدوا عن الادمان فده دين والحمدلله كان سبب في ان مئات المدمنين والمدخنين يرجعوا لحياتهم الطبيعية .. مساعدتك للناس الامية وانك تعلمهم القراية والكتابة فده دين .. و .. و .. الخ




وكان من أبرز الناس المعاصرين اللي ابتدى ينشر فكرة ان الاسلام (حفظ قران وشهادة دكتوراة) .. (صيام يوم تطوعي وممارسة رياضة) .. (صدقة للفقير وتنظيم وقت) .. (ذكر لله و خطة اهداف)