جرى هذا الحوار أمامى بين بعض مدرسى المرحلة الابتدائية:
وكيل المدرسة: المديرة بتاعتنا ولا بتهش ولا بتنش والمدرسة شكلها هتضيع.
مدرس لغة إنجليزية: عندك حق ، وعندى معلومات أن الأستاذ أسامة هيمسك المدرسة بداية من الترم الثانى حتى يضبطها.
مدرس لغة عربية : ومن هو الاستاذ أسامة؟
مدرس اللغة الانجليزية : كان مدرس رياضيات عندنا زمان واتنقل.
وكيل المدرسة : أسامة ما ينفعش لأن الناس هنا عارفينه ومش هيعرف يكون صارم معاهم .
مدرس اللغة العربية: يا عم اللى نعرفة أحسن من اللى منعرفوش ، احنا عاوزين -بالعربى كدة- مدير وموجهين يكونوا فى جيبنا...
مدرس اللغة الانجليزية وقبل أن يكمل مدرس العربى كلامه نظر له باشمئزاز : ازاى يعنى انت عاوز المدرسة تبوظ أكثر ما هى بيظة..
مدرس العربى: يا أخى استنى سيبنى أكمل كلامى انت عارف أصلا شروط الحافز الجديد؟
مدرس الانجليزى: لا
مدرس العربى: اشترطوا حتى تحصل على حافز الأعباء الوظيفية أن تحصل على تقرير ممتاز ولا تحصل على جزاءات أكثر من خمسة أيام وإلا حرمت من الحافز لمدة سنتين.
ويصمت مدرس اللغة الانجليزية وكأن على رأسه الطير.
مدرس العربى: موجها كلامه لمدرس اللغة الانجليزية: ماذا تفعل لو تعرضت لخفض تقريرك ووجدت مرتبك نقص 300 جنيه لمدة سنتين.
مدرس الانجليزى: ووجدت أن من عين بعدى بعشر سنين مرتبه أكبر منى؟!
مدرس العربى: نعم ، لان سيادة المدير مش راضى عنك أو مبتشلش الشنطة للموجه.. ماذا تفعل؟
مدرس الانجليزى: مش هشتغل وهبلطجلهم!!!!!
|