هى دى مصر يابهانه
فريق عبد الرحيم بيسرب وفريق الجلاد بيسرب وفريق الإخوان بيسرب وفريق الفلول بيسرب
ومفيش حد فيهم خلا فى عنيه حصوة ملح وفكر إزاى نتعاون و نخلى سد النهضة يسرب
يسرب الحياة لينا - وللِّى جايين بعدينا -
---كدا هتضيع مصر يا بهانه
استكتروا عليكى زغرودة على باب اللجنة
وفرحتك والحبر الأزرق فى ايديكى
بعد ماقضيتى عمرك فى السينما الصامته
ولاحد فيهم يوم سأل عن أراضيكى
ولما لقيتى نفسك وعرفتى طريقك بعد طول صبرك
اتكالبوا ولاد الأكابروصبوا غضبهم عليكى
اتهموكى بأشنع الاتهامات والظلم ظلمات وظلمات
قالوا جاهلة وغبية وكمان مضحوك عليكى
مع إنك قبل كدا خرجتى لهم و صوتى لهم وزغردتى لهم
وكان الكل ساعتها بيحلف بشرف ونزاهة معاليكى
وبدل مايلوموا نفسهم على فشلهم وخداعهم وخيبة أملهم
رموا غلهم وحقدهم وفشلهم عليكى
ماهى دى الحقيقة الغايبة فى مصر المتعلقة بحبال دايبه
كل أيام السنه لولاد الرايقه ولايوم ياحزينه ليكى
هتزعلى - إياكى تزعلى -
و اللى خلق الخلق عالم بخفايا الخلق
وبعدله ورحمته من شرورهم يحميكى
أصل ربك رب قلوب وراصد منابع المتأمرك والمغروب
سلمى أمرك لربك والأمل فى عدله يكفيكى
ومسيرها ترجع مصر لبهانه
وتفرح بهانه وتزغرد بهانه
ومايجرؤ حد على إهانة بهانه
لأن الحق والمستحق وكل الحق
الأحق بمصرجدود وأولاد وأحفاد بهانه
ولا إيه ؟
__________________
الحمد لله
|