[Attar]

أولا: انا بحييك على الموضوع الجامد ده.

ثانيا: بالنسبه للنتيجه انا جبت 92.6 (علمى رياضه) ومكنتش مصدوم اوى بس لانى كنت حاسس انى هجيب مجموع زى كده بس أكيد كنت زعلان.

يا رب بس التنسيق ينزل عشان انا بجد تعبت السنه دى ومتأكد ان ربنا مش هيضيع مجهودى.

ثالثا: بالنسبه بقى لأسئلتك.....

فيه حد بيثق فيك وانت خذلته قبل كده؟

للأسف حصلت مره واحده فى حياتى وكانت بجد غصب عنى ولحد دلوقتى نفسى الزمن يرجع تانى وميحصلش الموقف اللى حصل.

انت متدين ولا لا؟السؤال بصيغه احلى(هى علاقتك بربنا كويسه ولا لا؟)

عشان مكدبش عليك علاقتى بربنا وسط يعنى مش قريب اوى ومش بعيد اوى ودى مش حاجه حلوه لانى نفسى ابقى قريب اكتر من ربنا . وبصراحه انا مش راضى عن علاقتى بربنا دلوقتى. وحاسس انى مقصر اوى والمفروض ابقى اكتر جديه فى الموضوع ده.

لو بقيت مشرف ايه هى الحاجه اللى هتغيرها فى المنتدى بتاعنا؟

انا جربت الاشراف فى منتدى تانى بس لقيت انه مسئوليه كبيره ومش حاجه سهله فانا دلوقت مش بفكر فى الاشراف. بس بفرض انا بقيت مشرف فى المنتدى ده أكيد هساعد على قد ما اقدر انه يبقى احسن واحسن لانه بجد منتدى محترم بيقدم حاجه كويسه للطلبه وكمان منتدى منظم جدا.

وبصراحه الحاجه اللى عايزها تتشال من المنتدى قسم الاجابات النموذجيه للامتحانات لانها مش بتفيد فى اى حاجه غير انها بتضايق الطلاب. يعنى ايه الفايده انى ابص على اجابة امتحان خلص خالص هيحصل ايه غير انى لو لقيت اجابه غلط هتضايق وهيأثر على الماده اللى بعدها.

بعد ما عرفت النتيجه بتاعتك اختار تعليق مناسب تكتبه من دول يوصف حالتك
(الحمد لله/حسبى الله ونعم الوكيل /الله يخرب بيوتكوا-بدون ذكر اسماء-/يالا مش مهم كله محصل بعضه/لا تعليق

الحمد لله.

(سؤال خيالى شويه بس له هدف)لو انت عطشان ومفيش فى العالم غير بئر ميه واحد انت لواحدك عارف الخريطه علشان توصله بس هو بعيد عنك بعد القاهره عن اسكندريه ومفيش وسيله مواصلات
السؤال اهوه
هترضى انك تروح عند البير ده باى وسيله مع ان الموضوع شبه مستحيل ولا هتقعد فى البيت تصلى وتقرأ قران علشان مستنى الموت؟

أكيد هروح للبئر لان ربنا قالنا ناخد بالاسباب . عمر ما ربنا دعانا للكسل واليأس والضعف .
ومش معنى كده ان ما اصليش وادعى ربنا. لا ادعى ربنا انو ينقنذنى وفى نفس الوقت آخد بالاسباب واروح للبئر.

شكرا على الموضوع وآسف على الاطاله .