[3olomgy]

الف الف مبروووك اولاً وعقبال ما تزيدى فى تالتة إن شاء الله
ثانياً لازم تبصى للموضوع بشكل بعيد عن الحسابات او الاستخسار ..مثلاً كنت اعرف واحد كان عايز يدخل هندسة واهله دخلوه بترول وتعدين عشان استخسروا المجموع فى حين ان التالتة ع الجمهورية السنة اللى فاتت دخلت كلية العلوم لانها بتحبها ورفضت بترول وتعدين وهندسة و داخلاها بزيادة تسعة فى المية تقريبا ( كانت اتبرعت بيهم لاى حد طيب )
وحاليا هى الاولى ع الدفعة بمجموع خيالى وغير طبيعى(مقفلة اغلب المواد ) ..كل ده لانها دخلت الكلية لانها كانت حاباها فعلا وحاسة انها هتحقق فيها شىء
فبصى للمسألة من وجهة نظرك انتى فقط ..ماحدش هيقدر يفيدك قد نفسك
انتى حابة مجالات الحاسب والبرمجة و الميكانيكا والكهربا و الاتصالات وما شابه ؟...يبقى تدخلى رياضة
لو حابة علوم البيولوجى والوراثة وما شابه يبقى تدخلى علمى علوم
وما تبصيش بردو لكلية بعينها على انها منتهى املك فى الحياة ؛ يعنى لو مادخلتهاش خلاص مش هقدر اكمل فى غيرها ..لاء خلى عندك بدائل واستعداد نفسى وذهنى انك تبدعى فى اى كلية طالما انتى اختارتيها فى مجالك اللى بتحبيه
نصيحة اخوية : فى سنة تالتة اتعاملى على انك داخلة سنة جديدة خالص وانسى تماما مجموعك اللى جبتيه لان فيه ناس كتير بيحصل عندها نوع من الاستهتار فى تالتة
ومبروك مرة تانية وان شاء الله تميز بعد تميز