[اسراء سمير00]

المشاركة الأصلية كتبت بواسطة ahmed9699

السلام عليكم ورحمه الله وبركاته

انا مش عارف هكتب الموضوع ليه.. بس اعتبروه فضفضه وقرار نهائي وطلب صغير..

انا طالب 3ث علوم..
قصرت فحق نفسي كتيير جدا.. وقصرت فحق ربنا ..
سبت اليأس يتمكن فيا...

تقصيري ملوش اي عذر .. غير اني فعلا كنت مقصر ومهمل..
..
عملت موضوع هنا قبل كدا..
منكرش اني كنت محتاج شويه امل .. بس اكتشفت
او مش اكتشفت للأسف كنت عارف ان محدش هيفوقك غيرك
محدش هيساعدك غيرك انت...

..
الناس خلصت مناهج وبتحل امتحانات وانا لسه هقول ياهاادي ..

ظلمت نفسي .. كان فإيدي المقدره اني اكون احسن من الناس دي كلها...
اهلي موفرينلي كل الظروف.. مستوايا وعقليتي كويسه..
بس من غير اجتهاد مني يبقي ولا حاجه..
حلمي هيضيع .. هخذل ابويا وامي واهلي...

..
انا قررت انا المدعو احمد اني بدايه من يوم 10 مارس
_اينعم هفوق متأخر _ بس قررت اني هجتهد وهذاكر .. وهرضي ربنا وهعمل ال عليا .. وادعي من ربنا انو يكرمني
ربنا قادر ع كل شيئ ..

كفايه اهمال لحد كدا

محدش هيساعدك غير نفسك

واخيرا .. الطلب ال بطلبو من اي واحد دخل وقرا الموضوع انو يدعيلي بالله عليه
محتاج دعواتكم جدا

.. وشكرا

أولا :- انا بحييك علي شجاعتك دي وقرارك ده وإنك بتحاول تفوق كدا لنفسك
دي احسن خطوة اخدتها ومتقلقش ولا توتر نفسك
لسه قدامك فرصه تحاول تنجز فيها ان شاء الله بس اهم حاجة
هو انك تنظم وقتك بقدر الإمكان , وتقسيم المواد كدا مع نفسك , بعد كده
توفر لنفسك مكان هادي وبعيد عن الإزعاج علشان تقدر تركز في المذاكرة وده اهم حاجة

ثانيا :- طول ماقدامك هدف نفسك تحققه وهتسعي لأجله
ربنا عمره ماهيضيع تعبك وعلي قد ماتعبت هتاخد حقك ونصيبك
وخد بالك ( إن الله لا يضيع أجر من أحسن عملا ) تمام

ثالثا :- أهم شيء بلاش تحسس نفسك في اي وقت كدا وانت بتذاكر انك
خلاص ضعت ومستقبلك ضاع لا متخليش ده يأثر عليك أبداا وقت ماتلاقي نفسك
ملكش نفس تذاكر قوم صلي ركعتين كدا لله وهتبقي زي الفل وتمام ..

رابعا :- ثالثا دي قولتها لحضرتك لأن الوقت ده عدي علينا كلنا ف الثانوية العامه
يعني متحسش بأي احباط ابدااااا لان ده ضياع وتحاول تخطي الخطوة دي بإرادتك ان شاء الله وتركز ف مذاكرتك علشان توصل لهدفك ده وخليه دايما قدامك ..
وأتمني ليكم كلكم التوفيق إخواني وأخواتي طلاب الثانوية ويااااارب تحققوا كل أهدافكم وتوصلوا لأعلي
المستويات بإذن الله


خامسا :- أسفه علي الرغي ده كله والله
مع خالص تمنياتي لكم بالتوفيق والنجاح الباهر ان شاء الله
تحياتي