يا جماعه فى أكتر من طريقه فى الجواز معرفش اى واحده هيا الجواز النقليدى او الصلونات
يعنى مثلا: ان والدتى تشوف بنت صاحبتها فتقول : *والله انا عاوزه اجوزها لابنى* واروح اعد معاها وانا معرفهاش
انا مش مع الجواز ده خالص
فى بقى جواز تانى: بيبقى انا شفت واحده فى الجامعه مثلا وفى قبول مبدأى بروح أقولها :*انا معجب بيكى* وعايز اكلم والدك وكده ومش معنى كده انها خلاص ادبست وموافقه بالغصب
لا لما اروح لوالدها ويبقى كلامى معاها فى البيت عندهم او فى التليفون بس كل البيت عارف ان فى مشروع جواز والله لقينا ان احنا فاهمين بعض كان بها ولو لا قدر الله مفيش توافق يبقى كل شئ قسمه ونصيب ويبقى برده مفيش خطوبه اتعملت
ده جواز من وجهة نظرى جيد جدا.
اما بقى النوع التالت: انى اخرج مع البنت ونهزر ونروح ونيجى من غير ما حد من اهلها يعرف كل ده عشان نعرف بعض انا شايف ان ده جواز تعبان كده واضراره بتبقى اكتر على البنت لأكتر من سبب:
1- اول حاجه انتى متعرفيش الشخصيه اللى قدامك دى عامله ازاى يعنى بيتسلى ولا راجل جد وبتاع جواز.
2-تانى حاجه لو محصلش نصيب هيبقى انتى بس قعتى تلفى فى الشوارع وتخرجى على مفيش.
وفى شباب كتير للأسف مش بتتقى ربنا فى بنات الناس
وفعلا لو الشاب مش عايز يتقدم عشان ظروفه مثلا فهوا ممكن ببساطه يروح لوالد البنت دى ويقوله والله انا ظروفى كذا كذا .. ومش هعرف اجوز دلوقتى بس انا قدامى مده معينه وانا منظم نفسى .. وهكذا يعنى بيحسس والد العروسه انه مش جاى يلعب وفعلا هوا جاد فى الموضوع.
وبتيقى كل حاجه فى النور والبيت عارف ومش لازم الناس تعرف الا لو فى خطوبه بقى والموضوع مشى تمام *عشان يعنى البنات بتقول ان انا كده لو الموضوع ممشاش بتتحسب عليا خطوبه*
معلش انا طولت عليكم عموما لو النوع التانى بيسموا جواز تقليدى يبقى انا اكيد موافق عليه وشكرا على الموضوع الجميل.