[Eco esraa feps]

قصة كفاحى فى الثانوية العامه دى ولا الف ليلة وليلة (اتمنى ماتملوش بقى وانتو بتقروها واتمنى انكم تستمتعوا بالقصه وتاخدوا النصايح والعظة)
اولا عاوزاكو تتاكدو كويس ان ربنا كاتب لكل انسان هيدخل ايه دى حقيقه من قبل ما يتولد
وعاوزاكو تأمنوا ان لو علمتم ما فى الغيب لاخترتكم الواقع وكمان تتأكدو ان وعسى ان تكرهوا شيئا وهو خير لكم

علشان ماطولش كتير
انا فى تانيه ثانوى جبت 96% هيا بالضبط 95.9% قولت بقى احول رياضة بس ازاى وانا ميولى مش رياضيه انا كان نفسى فى كلية صيدلة او علاج طبيعى فمكانش ينفع احول رياضة مع ان الكل قالى رياضة اضمنلك بس بابا مكانش برضو عاوزنى احول لانى فى تانيه جبت اقل درجه فى الرياضة ولما نقصت نقصت فى فكرة مسأله نسيتها يعنى حاجه تافهه

المهم جيت كملت علوم انا اعترف انى ضيعت وقت كتير وخصوصا فى الاخر لما مليت وكان فى ظروف ف البيت وكده المهم دخلت امتحان العربى سنه2012 الامتحان كان سهل بس لقيت نفسى فى كام حاجه مش عارفاها فقررت اسيب العربى وقولت خلاص هعوضها فى الامتحانات الجاية جه امتحان الانجليزى زبااااااااااااااااااااااااله ومع ذالك امتحنته وامتحنت علم النفس بس وسبت الفيزياء والاحياء والعربى والمستوى للسنه اللى بعديها
كانت صدمة كبيرة ع البيت بس مكانش فى حاجه تانى اعملها وخصوصا انى داخلاه الامتحانات كلها وانا مذاكراه المادة كويس بس بتوتر فى اللجنه وبتعب بس الحمد لله اهلى فرحوا بعد كده خصوصا لما شافو تنسيق السنه دى السنه اللى كانت بيطرى خدت فيها من 97ونص وطب من 99و2 من عشرة وقالولى ان شاء اللله حظك حلو السنه الجاية
المهم
جيت فى تسنه 2013 تالته رقم 2 قولت بقى انا تمام فى كل المواد دى وبدأت اذاكر من اول 10 ومكانتش مذاكره مذاكره كان 3 ولا 4 ساعات فى اليوم بس كنت بجمع هيا مش بالساعات
المهم سبحانك ياربى دخلت العربى وبشهادة كل المدرسين امتحانات 2013 اصعب مليوووووووووووون مره من 2012
جبت فى العربى 27 والاحياء 47ونص والمستوى 8ونص والفيزياء 44ونص
يعنى الفيزياء هى اللى فرقت بينى وبين صيدلة
مع انى كنت حالاه الامتحان والمعلم والمثالى والكتاب وكنت باخد عند اتنين مدرسين غير ان بابا مدرس فيزياء شوفتو اد ايه ومع ذالك اغلط فى مسألتين مسألة انسى اجمع فيها حاجه فى بدايتها وتكمل للاخر غلط
ومسألة اغلط فى ناتج فى اولها واكملها غلط وطبعا اخدت درجات ع القانون بس
كانت صدمه ليا بكل المقاييس لما لقيت نفسى جايباه 95و2 من عشرة وقولت انا كده اخرى بيطرى ده لو جبتها
كنت بدعى ليل نهار انى ادخل بيطرى بس لانها فى محافظتى وقولت انا تعبت ومش عاوزاه بهدله بس وانا بدعى بقول يارب انت عارف انى مش حاباها بس اهى كلية والسلام بس انا فى الاول والاخر مكنتش حاباه
وبصراحه اكتر انا بعد امتحان الفيزياء تيقنت انى مش هدخل اى كلية علميه وقولت انا لازم اثبت نفسى حتى لو فى اداب
انا اتفاءلت اووووووووووووووووووووى بعد امتحان الفيزياء برغم يقينى انى مش هدخل كلية عليميه بس قولت وايه يعنى ما هو ناس كتير ناجحين وثبتوا نفسهم وهما فى كليات بسيطه

ووانل بكتب التنسيق كتبت بيطرى وبعديها اعلام واقتصاد وعلوم سياسية كنت عارفاه ان فى اعلام واقتصاد وعلوم سياسة اول سنه فى بنى سويف يعنى هتبقى اول دفعه ع سنتى
الكل عارضنى وقالى انتى بنت ماينفعش تبقى فى كليات زى دى وانتى مصيرك للجواز والكل اللى مايفيدش ده
والاغلب قالى ادخلى تربية ولا تجارة ولا علوم بس انا كنت هحس بيأس شديد لو دخلت كليات زى دى كنت هحس ان الدنيا قفلت وقولت خلاص
اه نسيت اقولكو من ضمن اللى كانو معترضين ع اعلام واقتصاد وعلوم سياسية قالولى لانك مالكيش واسطه ومش هتشتغلى لكن تربية هتشتغلى
انا بقى عاندت وقولت انا هاخد البكالوريوس ومش هشتغل وفعلا كتبت بيطرى ثم اعلام ثم اقتصاد وعلوم سياسة القاهرة ثم بنى سويف
ظهرت نتيجة التنسيق ولقيتنى قبلت فى اقتصاد وعلوم سياسية بنى سويف بالرغم من صدمتى انى مدخلتش بيطرى لانها فى محافظتى ومكنتش عاوزاه ابعد عن اصحابى وخصوصا بعد الثانويه العامه
الا انى اقسم بالله حسيت براحه فظيييييييييييييييييييييعه لدرجه انى بكيت من الفرحه انا كنت بعيط انى دخلت الكلية دى من فرحتى انى دخلتها وانا معرفش ليه بعييط من الفرح
المهم انا دلوقتى خلصت سنه اولى ورايحاه تانيه قضيت السنه دى سنه من اجمل سنين عمرى والحمد لله جبت امتياز الترم الاول ورتبت كمان ع الدفعه ودلوقتى الكل بيطمنا ويقولنا حافظو ع مستواكو لما احنا اول دفعه هياخدو معيدين كتير وكمان بعد المعيدين هيعينوا اوائل الطلبة اللى بعد المعيدين فى هيئات الدولة بدون وسايط اى نعم انا مرعوبة من نتيجة التيرم التانى ونفسى فعلا احافظ ع مستوايا ده وماقلش الا انى فرحانه اووووووووووووووووووووووووووووووووووووووووووووووووو ووووووى
الحمد لله ع كل اللى وصلتولو
اتمنى تكونو استفدتو حاجه من قصتى
لو عوزتوا اى سؤال اتفضلو ماتتكسفوش وانا مش هبخل عليكو بالاجابة