[أبو العلاء]

بباقةْ وردْ مغموسةْ بدم الشعبْ

بيتْأَسّف على غلطةْ عملها الذئبْ

وناسي إنه أُستاذه الجليل ف النصبْ !!!

ثياب الوعظْ مش لايْقه عليكْ يا خِبْ

بتقْـتِلْ أمّه بالكاملْ بتنفيذكْ

وتتأسّفْ على غلطة لتلميذك ؟!!

غصبْت إرادةِ الأمةْ اللي كات حرة

وقلْت انّ انتَ مش طامعْ وهتشوفوا !!

وشوفنا انّ انتَ أستاذ البشَرْ فِ الكِدبْ

بتكشف ليه عن العُذْرة

لو انتَ صحيحْ تخاف الذنبْ ؟

وسيبتْ وحُوشَك الضالة بتنهشْ لحم كل الخلق ؟

مفرّقْتِش ما بينْ طفلةْ وستّ وشيخْ وبين الشبّ

جرفْتِ بدمّك البارد جثثْ شهداء

وفرّقْت بْرصاصك بين رضيعْ وامّه وبين الأبْ

وفجّرْت الدماغْ والقلبْ

وفي الآخر

عاوزْنا نصدّق انّ انتَ رسول الحب ؟!!!

ما تسْمعْ منّي دي الكلمةْ :

صحيح انّ احنا أخطأنا ف تقديركْ

ورحنا نهنّي بعضينا بتمثيلكْ

لكن شهداءْنا بيقولو:

دمانا لعنةْ هتصيبكْ

ومش ناوية انّها تسيبكْ

وهتحاسْبكْ وهتجيبكْ

سواءْ ف الدنيا هتجيبكْ

سواءْ ف الآخرهْ هتجيبكْ

أمام الرب

فإرمي يللا أوراقكْ

وكمّلْ لعبْ