[*تائبة فى رحاب الله*]

المشاركة الأصلية كتبت بواسطة hazemon

شكراا جدا علي الافادة يعني مجبش كتاب الاضواء طيب الرسالة كويس ولامتحان عامل ايه في الاسئلة كويس يعني من الاخر ايه افضل كتب خارجية اذاكر منها واحل منها واستفيد منها شرح نحو وبلاغة وكله وفي المعاني بردو ثانيا هل المعاني ممكن تيجي برة كتاب المدرسة ولا ايه نظامه والكيمياء الرموز نسيتها
اراجع عليها ولا ابدا كيمياء وكده كده مع المذاكرة هظبط نفسي ثانيا انت مقلتيش النحو انا تعبان في هل لو انا حليت هقدر اظبط نفسي فيه والبلاغة بردو وهل لازم اذاكر عربي كل يوم ولا عادي واذاكر فرع واحد ففي اليوم ولا اكتر من فرع وشكراااا



ملحووووظة انا ولد

الشكر لله
الرسآلة جميل جدا فى المراجعة فيه تقريبا 120 نموذج نحو و100 نموذج بلاغة ومجمع كل امتحانات الثانوية المصرية والسودان على كل درس هو بينزل فى شهر 3 تقريباً ..
الامتحان ده أساس يكون معاك هو مش فيه منه شرح فده عامل زى اختبارات دورية على كل درس انا كان معايا كل ده ...
بص يعنى انت هتسمع شرح الاستاذ وتذاكر من مذكرته + الوسام + كتاب المدرسة
الحل : الامتحآن
المرآجعة : الأضوآء + الرسآلة
ولو مش عاوز تجيب الرسالة عادى بس لو عندك رهبة من الامتحانات هاتوا اهه تتعود عليه وتحل نحو كتير
الوسآم شارح النحو والبلاغة جمييييييييييييييل جدا بصراحة احسن كتاب شرح الوسام بلا منافس احسن من الاضواء كمان
ده اكيد فيه معانى مش هتكون مكتوبة فى كتاب المدرسة هو بكتيره فى الدرس 5 او 6 معانى
بس 5 او 6 معانى يتحفظوااااا جامد لان وانت بتحل خاصة فى دليل التقويم هيخيرك بين كلمات تحس انها صح والمدرس مديلك الاتنين بس هتفتح كتاب المدرسة هتلاقى مديك معنى واحد
وزى مقلت المعانى من الوسآم + مدرسك
لو حب يلعب فى المعانى والكلمات اللى كلها زى بعضها يبقى من كتاب المدرسة انما المعانى السهلة من برة عادى وغالباً بتكون من الشرح اه والله ^^..
يعنى فى درس اسمه الشاعر وصورة الكامل عندكم كان فى امتحان ثانوية عامة 1997 و 2009
جايب كلمة وله معنيين مختلفين ومدهملك فى الاختيارات كانت كلمة ( هآئماً ) ولها معنيين
محبا بشدة أو ضآلاً والمعنيين يمشوا على حسب متقرأ القصيدة وجت الاجابة فى النموذج محبا بشدة ! عشان فى الشرح
القصد انك تفهم القصيدة من شرح كتاب المدرسة وهتقدر تخمن على فكرة المعانى بمرور الوقت...
مش هيجيبولك معانى من السمآء ولا هيعقدوك ان شاء الله

النحو : مع مذاكرة الدرس والتطبيق عليه اول بأول وحل قطع كتييير جدا هيقابلك كل انواع الاسئلة وهتدخل الامتحان وانت مطمن ع الاخر بإذن الله
البلآغة ملهاش علاج الا الحل تحل نماذج كتير والاسئلة المقالية بتاعتها
هتحفظ تعريف الوحدة العضوية ومقوماتها عشان لو طلبها منك وبردة حفظ معنى التجربة الشعرية وشروط القافية بس .
يعنى عاوز تقفل نحو + بلاغة = حل كتير ونماذج كتير جداً
دليل التقويم فيه حوالى 28 قطعة نحو والامتحان فيه 85 قطعة نحو
وتقريبا 50 نموذج بلاغة
___
العربى مذاكرته : النصوص والادب تعتبرهم فى مذاكرتك فرع واحد الادب جزء لا يتجزأ من النصوص ^^
القرآءة تذاكرها سؤال وجوآب من مذكرة الاستاذ او على حسب الاستاذ اللى انت بتروح عنده
وعشان تسهل على نفسك المعانى هتعمل زى النصوص
بمعنى انك هتذاكر الدرس وتحفظه سؤال وجواب تفتح كتاب المدرسة او اى كتاب وتقرأ الدرس وتبدأ انت تحط الاسئلة من عندك وتشد خط تحت الاجابة تعيد على الدرس التانى وكل كلمة موجود لها معنى او مفرد او جمع او عكس تشد تحتها خط وتكتبه فوقها بالرصاص
تالت مرة بقى تقرأ الدرس هتكون كونت فكرته ومعانيه وكل حاجة فى دماغك وهتلاقيه سهل جدااااا هى دروس القرآءة دروس متقسمين 4 و 4 يعنى فى الامتحان بيجيب واحد من 4 الاولنيين وواحد من التانيين
يعنى الدرس 3 مرآت ...

تحل نحو وبلاغة مع بعض
____
بالنسبة للكيميا فالرموز مش مهمة اوى لان الحساب الكيميائى ده الحاجة الوحيدة اللى هتحتاج فيها الرموز وهو غصب عنه بيكتبلك الرموز والكتل الذرية بتاعتها عشان مش مطالب بحفظ كتلهم ومع الوقت هتحفظ الرموز وهم مبيجبوش عناصر معجزة دى حاجات متداولة
واكترهم صوديوم وكلور و.... كدة
انما فى العضوية انت اللى بتستنتج الرمز بنفسك ^^ متقلقش الكيميا سهلة محتاجة تركيز بس اول فصلين وسيبك من المسائل المعقدة مش بتيجى حل الامتحان وخلاص
ولو عاوز تراجع تبقى تجيب الوسام عشان تطمن نفسك

عآرفة ان حضرتك ولد ^^.. هى جت غلطة منى وانا بقول ( تحسى )
معلش