[DPT-Blue Phoenix]

#توعية_بدور_العلاج_الطبيعى
#كل_ما_تريد_معرفته_عن_العلاج_الطبيعى

السلام عليكم و رحمة الله و بركاته
بسم الله الرحمن الرحيم

#كيف_تذاكر_العلاج_الكهربى_و_المائى ؟!

1- انا معارض تماما ان مادة العلاج الكهربى و العلاج المائى تدرس فى سنة أولى ليه :/ ؟!

- لأن المواد دى معتمدة على مواد كتير منها الفيزياء الحيوية عشان زى ما قلنا اصل الاجهزة او الماء او الحرارة أو البرودة و كدا فيزياء و الاثار الفسيولوجية معتمدة على علم الفسيولوجى فلما هتاخد الكلام دا فى الأول و انت لسه بتبدأ فسيولوجى مش هتفهم كتير و كمان معتمدة على اسامى مناطق و اماكن فى الجسم و دا علم التشريح غير حاجات تانية زى علم الامراض و غيره ...

2- طيب دلوقت انا اعمل ايه عشان اقدر ازاكر مادة بالشكل دا و استمتع كمان ؟!

- بص يا سيدى اولا فى جزء فيزيائى كدا فى الأول و الجزء دا سهل انك تعرفه ازاى ؟! بانك تقسم الاجهزة تقسيمات يعنى مثلا الاجهزة دى كلها كهرباء تمام و الكهرباء دى بتتولد بطرق كذا و كذا طيب الاجهزة دى اشعاعات و ممكن اولد الاشعاعات دى عن طريق كذا و كذا و هكذا بقسم .... و بعدين بشوف ميزة كل جهاز من الناحية دى و احفظها ؟!

- طيب الاجزاء الاهم بقى الى هى ((الاثار الفسيولوجية للجهاز على الجسم + دواعى الاستعمال + موانع الاستعمال)) الاجهزة الى هتشوفها كلها هتكون نوع من الاربعة دول :-

1- ((اجهزة كهربائية)) =D بتعالج بالكهرباء المباشرة زى جهاز اسمه الفارادك او التنس او غيره و دول هتدرسهم كلهم فى الترم التانى يبقى انا بفهم ان كل دول ليهم اثار مشتركة و بيكون فى درس جامع للكلام دا اذاكره كويس و اطبقه على كل الاجهزة + اعرف ميزة كل جهاز ان شاء الله حتى تكتب ميزة كل جهاز جنب اسمه و برده ليهم امراض عامة لكن برده بتميز كل جهاز بحتة كدا

2- ((اجهزة حرارية)) منها اشعاعات زى الاشعة تحت الحمراء او الموجات فوق الصوتية او انواع تانية برده بذاكر الاثار العامة للحرارة و بالتالى بعرف الاثار العامة للحرارة + بميز كل جهاز بحاجة و برده فى امراض عامة و برده اميز كل جهاز بحاجة و الاجهزة الحرارية دى هنلاقى منها شوية فى الالكترو و دى بتطلع نوع من الحرارة اسمه ((الحرارة الجافة Dry Heat)) و شوية فى الهيدرو دول مش اشعاعات زى الكمادات الساخنة و شمع البارافين و غيره و دا بتطلع نوع من الحرارة اسمه ((الحرارة الرطبة Moist Heat)) و دى افضل شوية لأنها بتحسس المريض بالراحة اكتر و ليها اختراق لأنسجة الجسم السفلية بشكل افضل بس ارجع و اقول كل حاجة ليها فايدتها

3- ((اجهزة البرودة)) 8-) و دى كلها فى الهيدرو و وراء بعضها و برده زى ما قلنا بتحفظ الحاجات العامة المشتركة و بعدين بتميز كل جهاز عن التانى بحاجة

4- ((الماء)) | العلاج بالماء بقى بذاكر خصائص الماء كويس جداااااااااااا و افهمها و بعدين ابدأ اطبق دا بعد كدا

5- فى اجهزة مش فى التقسيمات دى ((زى الاشعة فوق البنفسجية او المغناطيس او غيره و دى حاجات بتبقى مميزة لواحدها و ان شاء الله مفيش فيها مشكلة))

- يعنى فى الأول و الاخر المادتين دول بيعتمدوا على تقسيمة مظبوطة من الأول و انا قلتها فوق و بعدين بتبدأ تحفظ ميزة كل جهاز و بالتالى انا لما هسألك مثلا و اقولك ايه الاثار الفسيولوجية مثلا للاشعة تحت الحمراء ؟! هترد تقول دا جهاز حرارى و موجات كهرومغناطيسية يبقى من مميزاتها بتقلل الالم مثلا و كذا كذا + طيب من الامراض الى بتعالجها الالام المختلفة زى الشد العضلى + من موانع الاستعمال مثلا الاورام السرطانية او الخبيثة + ((تعرف ميزة الجهاز عن باقى الاجهزة))

- بالنسبة للحاجات الى انت مش فاهمها حاول تسأل فيها اول بأول و متتكسفش اصل لو اتكسفت دلوقت هتتكسف على طول و هتتراكم الحاجات ورا بعضها و مش هتفهم بعد ما تذاكر كل درس جمع الى مش فاهمه و اسأل فيه او لو جزء بسيط ممكن تبحث على النت و حاول تتناقش مع زمايلك و كدا و ربنا يوفقكم

- كدا خلصنا مواد العلاج الطبيعى كلها و بعدين هنتكلم عن مواد طب و السلام عليكم