بسم الله الرحمن الرحيم
انا اسف عالتاخير فالرد يا جماعة
الحقيقة بالنسبة للسؤال الاول
فدى كانت اكبر مشكلة عندى ان انا سبت الدروس هيه اللى تنظملى و قتى و بقيت بذاكر على حسب الدروس و اللى عندى بكرة و ده من اكبر الاخطاء اللى انا وقعت فيها و ارجووكو حاولو تظبطو مذاكرتكو و تمشو الدروس عليها مش العكس عشان تقدرو تذاكرو الدرس بعد ما ترجعو على طول عشان ده مهم جدا و هيخليكو مرتاحين نفسيا و حاسين انا ما وراكوش حاجات كتير وده برده مهم اوى
بالنسبة لموضوع جدول المذاكرة فانا الحقيقة عمرى ما مشيت على جدول لكن افضل اسلوب لقيته هو تحديد الحاجات اللى ورايا النهاردة مثلا و اكتبها فى ورقة و كل ما اخلص جاجة اشطبها وده بيرفع معنوياتنا و يساعدنا اننا نكمل و منزهقش بسرعة
بالنسبة للكتب الخارجية
العربى الاضواء (مذاكرة)+الوسام + الرسالة مراجعة نهائية او اى كتاب فيه اسئلة امتحانات قديمة متجاوبة
english توب و بست وسنيور و gem
الفرنساوى برافو شرح + مرسى مراجعة + مذكرة المسيو
الكيميا (لغات)المعاصر + مذكرة المستر شرح ومراجعة
الفيزيا (لغات)الوسام مسائل وشرح و سامى بوك امتحانات و مذكرة المستر
الاحياء لغات سامى بوك شرح و حل و مراجعة
الجيولوجى الامتحاان شرح (لازم تتذاكر من الامتحان بعد مراجهتها بكتاب الوزارة عشان فى حاجات بينسوها او من اى مذكرة مطابقة لكتاب الوزارة بس اوعوا المذكرات المختصرة بتودى فداهية )+ الامتحان مراجعة و كشكول الاول
حكاية تنظيم الوقت دى متركزيش فيها اوى عشان هتتعبى فحاولى تذاكرى على قد ما تقدرى و متضيعيش وقت كتير فالبيت عشان الدروس بتضيع وقت كتير اوى و متقلقيش من الوقت اللى الدروس بتضيعو لان كل الناس كده
و انا كنت باخد فى كل مادة درس واحد ما عدا الفيزيا روحت لواحد تانى شرح و سبتو فى المراجعة و العربى روحت لواحد تانى فى الاخر مراجعة و انا ما بنصحش بدرسين فى اى مادة الا لو فى مشكلة فالمادة دى
و بالنسبة لموضوع المذاكرة فاول السنة بلاش تموتى نفسك اوى زاكرى اللى بتاخديه و حلى عليه عالسريع و خدى كده اول شهر لحد ما توصلى لاحسن حاجة فبداية الشهر التانى و اهم حاجة المستوى الثااااااااااااابت طول السنة لأن ناس كانت بتموت نفسها اول السنة و فالاخر تزهق و تسيب الكتاب خالص و جابو مجاميع مش قد كده
و ربنا يوفقكو ان شاء الله سنة سهلة عليكو و خلى دايما احلامكو قدامكو و الله العظيم ما فيش تعب فى الدنيا تساوى فرحة اهلكو يوم النتيجة
و لو عايزين حاجة تانى انا موجود وهحاول ارد فاسرع وقت
|