مبرووووووووك
الاول انت طب ايه كل كلية وليها نظامها
عندنا طب المنصورة اخر اليوم عندنا الساعة 2ونص مبنتأخرش عن كده الحمد لله ده احلا حاجة فيها بس الصعب بقا ان عندنا المحاضرات كلها ورا بعض لكن مش ف كل الايام يعنى علا حسب بقا سكاشنك
انا السنة دى مكنتش بحضر محاضرات كتير الصراحة معرفتش التزم واعتمدت عالتسجيلات بس بدره كنت بمل منها وكسلت كتير للأسف واثر عليا ف الاخر فانت اهم حاجة ف الكلية بس اللى تاخده تزاكره أوووول بأوووول عشان لو اهملت اسبوع واحد بس صدقنى الموضوع هيعجز معاك والعملية هتصعب اوى :\ يعنى الكلية عادية بس صعوبتها ف ان المناهج تقيلة شوية عشان تتغلب عالموضوع ده فمن اول السنة اللى تاخده من هنا تروح تزاكره من هنا تانى يوم هتاخد حاجة جديدة تروح تزاكرها هتيجي تبص للي زاكرته امبارح هتلاقيه اتبخر مش مشكلة متحاولش تضيع وقتك فى مزاكرته من تانى المهم الجديد يتقرأ أول بأول يعنى اللى تزاكره تنساه بقا مش هيتفتح تانى غير اخر السنة
لو فيه وقت ولاقيت نفسك انجزت يبقا كده تمام اوى راجع شوية من اللى فات اهم حاجة بس الجديد يخلص الاول قبل الامتحانات بيبقا فيه مدة كافية هتقدر تزاكر وتراجع المهم تكون طول السنة قارئ المناهج ومتابع كويس مع الدكاترة عشان مخك ميفلتش منك وتلاقي نفسك تايه وتكتئب بقا وتقول انا ايه اللى دخلنى الكلية دى اه يانى ياما يابا
ربنا يوفقك الموضوع بسيط والله بص طب اكتر كلية بيبقا فيها نسبة امتيازات عن باقي الكليات وزمايلكو كلهم مفيش حد احسن من حد كلكو زى بعض ومجموع الثانوية ده تنساه خالص ومتسألش حد فى الكلية انت كنت جااااااااايب كام ف الثانوية بجد صدقنى اوعى تعمل كده وتمشي تقارن نفسك بغيرك وده كنت جايب اعلا منه يبقا انا اشطر وهجيب ف الكلية اعلا لا ده فلان جاب 100% لا انا اكيد اقل منه و و و .. الكلام ده حاول ع اد ماتقدر تتجنب فتحه اللى عدى خلاص فات وانتهى كلنا دخلنا طب يبقا كلنا مستوى واااااااااااحد واى طالب يقدر يرتب عالدفعة بشرط تنظيم مزاكرتك كويس ومتراكمش حاجة عليك وتقول هبقا ازاكرها بكرة مع الجديد لالالالا تجنب الحتة دى لو قلت كده صدقنى والله ماهتفتحها غير قبل الامتحان واه بقا لو فتحت المنهج لأول مرة فى الفترة اللى قبل الامتحان مقولكش علا كمية الاحباط والخنقة والقرف اللى هتجيلك بجد
وسيبك من موضوع التأجيل ده خااااااااااالص انساه عشان التأجيل ده بجد ازبل حاجة
انا للأسف مزاكرتش كويس للفسيولوجى وأجلته لشهر 9 وادينى قاعدة اهو واخدة الاجازة كلها مزاكرة ومعرفتش اشم نفسي
والامتحان قبل الدراسة بخمس ايام يعنى هخلص من هنا وادخل من هنا مفيش اجازة
ودلوقتى بضرب نفسي مية جزمة انى مزاكرتش اول بأول طول السنة
عشان تخرج نفسك من دوامات كتير اوى هتقابلك ف الكلية الحل الوحيد انك تزاكر دايما وتسيبها لله وربنا هيوفقك ان شاء الله