[optimistic girl]

المشاركة الأصلية كتبت بواسطة space4

السلام عليكم ورحمة الله وبركاته
كيف حالكم أبطال الثانوية العامة ؟

أول حاجة أعرفكو بنفسي .. أنا كنت طالبة السنة اللي فاتت ثانوية عامة وكنت حاسة بنفس احساسكم دا من خوف وتوتر وشد أعصاب بس والله الموضوع مش محتاج كل دا ، عارفة انو مش هتقدرو تمنعو الشعور دا بس على الاقل ما تخلهوش عامل يحبط من همتكم
الحمدلله ربنا وفقني واتقبلت في كلية طب بشري ، ربنا وفقني الحمدلله وجبت مجموع مكنتش متصوراه فالحمد والشكر لله أولا وآخرا كانت نسبتي 99.63% نظام حديث وكنت الاولى ع المدرسة والادارة لا والمحافظة كمان فالحمد والشكر لله الحمدلله

أنا دخلت الموضوع هنا لما شفت همتكم ونشاطكم وعزيمتكم بصراحة جذبتني لأني أكتب لكم كلمة صغيرة فاتقبلوها مني

ربنا يوفقكم وبكون معاكم
أكيد أنا مش أول ولا آخر وحدة قالت الكلام دا ، بصراحة استفدت كتيير من المنتدى ربنا يجزى العاملين عليه والمدرسين وكل من ساهم فيه ولو بكلمة ربنا يجزاهم كل خير ان شاء الله ويجعلو في ميزان حسناتهم زي ما وقفو معانا طول السنة وقبل الامتحانات وفي الامتحانات وبعدها

أهم حاجة كطالب ثانوية عامة تكون ثقتك بربك سبحانه وتعالى قوية لا تتزعزع وعلاقتك بربنا تكون كويسة اقرأ قرآن متقولش معنديش وقت صدقني ربنا هييسر لك كل اللي انت شايفه صعب وإياك إياك تيأس ولا تقول الدرس دا صعب أنا كدا خلاص ضعت ، كل حاجة بتيجي في أوانها وكل كلمة في الكتاب هتتفهم في وقتها

مش عايزة اطول عليكو بس خلو عندكو هدف مش قصدي انكم تعلقو املكم بكلية معينة لأ الحاجة دي من عند ربنا ، ربنا كاتبلي الخير في كلية غير اللي كنت اتمناها فمفيش مانع من اني اتقبل كدا
المهم انك تجتهد وتذاكر وتقوي علاقتك بربنا وتعمل اللي عليك وربنا مش بيضع جهدك بالعكس دا بيديك سبحانه اكتر من اللي بتتصوره

واخيرا بدعيلكو من كل قلبي ربنا معاكم وييسر لكم الحال ويوفقكم ويرزقكم اللي تتمنوه ...
استمروا على نفس الهمة وما تقللوش من قدر نفسكو وما تقارنوش نفسكو بحد تاني لأنك هتعمل اللي محدش عملو قبل كدا

شكراا لاهتمااامك ودعواتك