[اوركيديا]

حَظّك اليوم...


تيجى نحسبها نلاقيها...

إحنا فيها...

لفّ واتفرج معايا...

ع اللى نايم...

واللى صاحى...

واللى طافى النور وصاحى...

واللى بتسليه جراحى...

واللى قال فات الكتير...

واللى طاير...

بس مكسور الضمير...

ع اللى مشغول بالدولار...

واللى ضيّع نص عمره...

فى كام بهيمة وكام حمار...

واللى قال الأرض باقية

واللى طُور مربوط فى ساقية...

واللى لسه قميُصه ناقص زُرار...

وفى ثوانى...

مات كيلانى...

كل واحد فينا قام يحسبها تانى...

اللى نايم واللى صاحى...

واللى بيفكر ينام...

كله قام...

أد إيه ف العمر باقى...

يسوى كام...

أما شاعر بايخ...

جىّ ليه تشعللها نار...

يلّلا نهرب من قساوة الجَدَّ...

ونضيع ف الهزار...

ف العصير والفطير...

واللى لسه قميصُه...

ناقص فيه زُرار...



مش أنا امبارح


مش أنا امبارح
رحت من بيتنا في السيدة
للشغل في حلون
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
والحمد لله
على كل شيء