علمي علوم /
المواد كالتالي : عربي - فيزياء - كيمياء - أحياء - انجليزي - جيلوجيا - لغة اجنبية ثانية .
مميزاتها :
1- (( كروتها كتير )) بمعني ان فرق بين الكليات فروق بسيطة لو ملحقتش دي تلحق دي ، بمعني لو ملحقتش طب لقدر الله تلحق أسنان ولو ملحقتش اسنان تلحق صيدلة ولو ملحقتهاش علاج طبيعي ولو ملحقتهاش بيطري ولو ملحقتهاش علوم ولو ملحقتهاش تمريض ... وهكذا .
2 - نظرة المجتمع ( ودا طبعا الحاجة اللي بقت بتوجه الناس كلها ) و اللي بيستجيب ليها أهل أي طالب , عاوز ابنه يبقي دكتور .
3 - امتحاناتها مضمونة نسبيا ، يعني هوا منهج أحياء مش كبير و منهج جيلوجيا لو حفظتهم صم (( طبقا لنظام التعليم الشامخ بتاعنا )) هتقفلهم وانت حاطط رجل ع رجل .
عيوبها :
1 - مش مناسبة للطلبة اللي متحبش تحفظ ( هيتعبوا فيها ) ، لأنك لازم تدعم حفظك بفهم .
2 - عاوزة مجهود أعلي من الرياضة ، بالنسبة للي عاوز يجيب مجموع عالي فوق ال 97 % .
............................
علمي رياضة /
المواد كالتالي : عربي - فيزياء - كيمياء - رياضة 2 - انجليزي - لغة اجنبية ثانية .
مميزاتها :
1 - ملائمة للطلبة اللي بيحبوا الرياضة وبيحبوا التفكير والفيزيا و مبيحبوش يحفظوا كتير .
2 - ملائمة جدا لذوي الأحلام المتوسطة .. يعني لو واحد مستواه وسط هيدخل ويجيب كلية هندسة وهتكفيه .
3 - طالبة تحدي بالنسبة اللي عاوز يجيب بترول
عيوبها :
1 - (( كروتها قليلة )) فرق بين هندسة بترول وهندسة عادية تقريبا 5 % وممكن متلحقش بترول علي .2 زي ماحصل لبعض صحابي ودخلوا هندسة عادية .
2 - امتحاناتها مش مضمونة يعني ممكن تحل كل الملخصات وتدخل تلاقي مسألة أول مرة تشوفها وفيها فكرة جديدة .
ـــــــــــــــــــــــــــــــــــــــــــــــ
تقريبا دا كل حاجة عن الاتنين ولك حرية الإختيار :
- شوف انت نفسك تبقي ايه وجازف عشان توصل لحلمك .
- صل استخارة واللي ربنا يقسمه ليك هيكون وتوكل علي الله
أتمني أكون افدتك .. انت طلبت تفصيل ممل ومفيش أمل من كدا
