بسم الله الرحمن الرحيم ،،،، السلام عليكم ورحمة الله وبركاته
ازايكم يا شباب أتمنى تكونوا استفدتم من الكومنت اللي فات
بس احنا في الكومنت بتاع النهاردة وزي ما بيقولوا اللي فات مات
بس بجد مش عايز الاستراتيجيات دي تموت
طيب
كتيييييييييييييييييير جدا من الطلاب يجي يبدأ السنة ويقولك ده أنا هدغدغ الدنيا السنادي وهعمل وهسوي الهوايل ويجي بعد ويمكن أقل بطة بلدي
مع احترامي للبط البلدي
أصل أنت ابتديت بحماس زائد جدا والحماس ده عمره ما هيستمر أصل أنت كنت عاطفي مش عقلاني اعتمدت على الأحاسيس والشعور ودي أصلا متقلبة
طب الحل
العاطفة مهمة جدا بس العقلانية أهم
طب أعمل ايه ؟!
بص يا ريس صل بنا على النبي
دلوقت أنت لازم يبقى عندك كم وكم
وعندك هدف كمي توصله
وأدامه برضو كم
؟!
ايه الكلام ده
هبسطهالك هدفك الكمي يعني مجموعك نفسك مثلا تجيب 99% يبقى لازم تدي مذاكرتك عدد مناسب من الساعات ودي أول حاجة لازم تعرف الكم بالكم
طيب أنت بتذاكر مثلا من ملازم حلو
شوف عدد الصفحات في كل الملازم في كل مادة وابتدي اقسم عدد الصفحات دي على عدد ساعات
على سبيل المثال احنا في 2 ث عندنا المفروض 6 مواد تضاف إلى المجموع لو كل مادة فيها 150 صفحة المنهج كله يبقى عندك عدد صفحات 900 في كل المواد
علمياً متوسط الوقت اللي ممكن تاخده الصفحة هو من ربع لتلت ساعة
يعني أنت محتاج حوالي 300 ساعة عشان تخلص المناهج
طيب جميل
بص يا ريس وده كلامي ل 2 ث إنما ثانوية عامة ليها نظام أعلى
أنت يومياً ذاكر إما 5 ساعات طول ال 7 أيام
أو تذاكر 6 ساعات على مدار 6 أيام وتريح يوم مش حارمك من حاجة أهوه
يعني المفروض تنتج أسبوعيا حوالي 35 36 ساعة مذاكرة
لو عايز أكتر مش مهم يريت بس استمر الأول على ده
يعني لو جيت تحسبها أنت محتاج حوالي 8 أسابيع عشان تخلص المنهج كله يعني شهرين
وحط الخطة اللي تريحك
نيجي للبيذاكر من كتاب بقى ده عدد الصفح صعب شوية في الحصر
على سبيل المثال مادة زي العربي عندنا 29 درس
لازم تحددلك أنت هتخلص أمتى أول خلال كام أسبوع
يعني مثلا هنقول أنت عايز تخلص بعد 8 أسابيع المناهج كلها
فبالتالي العربي ده هيتقسم على 8 أسابيع يعني كل أسبوع محتاج حوالي 3ونص درس تذاكره
وتحاول تراقب نفسك دايما أنت فين
يعني بعد أسبوعين المفروض مخلص ربع المنهج يعني 7 دروس فبالتالي هتعرف أنت مشيت صح ولا لاء
وتخلي الأولولية لو في امتحان طبعاً أو دروس متراكمة
بس المهم تنتج أسبوعيا 35 ساعة لو زاد حلو لو قل لا تحبط نفسك المهم إنك ابتديت
لازم كمان تاخدها في دماخك قاعدة ذهبية سواء في العلمي أو الأدبي
لازم تحل
ذاكر ربع ساعة وحل ساعة
وتحدد برضو عدد الأسئلة يعني مثلا قلنا 35 ساعة
في كل ساعة المفروض تنتج هنقول 3 صفحات
يعني في ال35 ساعة المفروض هتنتج 105 صفحة وممكن لو 4 صفحات في الساعة تنتج 140 صفحة أنت وتركيزك في صفحات متاخدش خمس دقائق
والمفروض تحدد عدد أسئلة تحله برضو أسبوعياً يعني لو أنتجت 105 صفحة حاول تحل أدامه 150 سؤال بمتوسط 25 سؤال لكل مادة بس طبعا يعني مثلا أ ب ج د ده أسئلة كلها
يبقى اتفقنا لازم الخطة محددة بأرقام عشان تقدر تكمل صح ولازم تتابع نفسك كل أسبوعين لأنك لو حددت خطتك على 8 أسابيع زي ما قلت يبقى لازم كل أسبوعين تبقى مخلص ربع المناهج في الست مواد دي
عقلك بيتعامل مع كم مينفعش يتعامل بشكل عشوائي يعني تعد على مكتبك تحدد بالظبط أنت هتحل كام سؤال هتذاكر أد ايه كم صفحة كل ده لازم خطتك تبقى متكاملة ومرنة كمان وتسيب وقت لامتحانات الشهور
بالنسبة للثانوية العامة في إيجاز كده أنتم فهمتم الخطة لازم كم محدد
بس النظام ده اسمه 888 يعني تقسم يومك على 3 فترات كل فترة 8 ساعات
8 نوم أساسي ممكن تبقى 7 أو 6 على حسب دماخك وبرضو الوقت اللي تحبه
8 مذاكرة وده مناسب جدا جدا جدا
و8 دروس أو مدرسة
وفي نظام برضو للجميع 20/80
يعني تذاكر بجهد 20% وتنتج 80% يعني متعدتش على الصفحة ساعتين ده عمرك ما هتخلص في حياتك صدقني واللي واقع منك بيتعوض في المراجعة والحل يا سيدي
ونظام 40 120 200
يعني تذاكر أسبوعيا 40 ساعة
وتذاكر 120 صفحة لو بتذاكر من ملازم طبعا
وتحل 200 سؤال
في أبسط من كده ؟!
المهم أنكم تفهموا الخطة العامة أنك لازم تتعامل مع كم مع أرقام وأنت وخطتك بقى يا سيدي
استنوني بإذن الله الكومنت الجاي وأسس تنظيم جدول للمذاكرة
شكرا ليكم