[Mohamed_Hamza]

المشاركة الأصلية كتبت بواسطة سوسوكاتى

جزاك الله كل خير
كان عندى استفسار بس
دلوقتى انا باخد كيميا وفيزيا عند استاذة عندنا المهم يعنى الاستاذة دى مبتعترفش لو اجابة سؤال علل نص سطر او سطر حتى ولو كتاب الامتحان مثلا مجاوبها كده او حتى نموذج اجابة الوزارة وبتقولنا اى حاجة فى الامتحان لازم نقعد نشرح اصلها وفصلها عشان المصحح يفهم وبالتالى انا بتضايق اوى كل اما امتحن عندها عشان بحس انى لو عملت كده فى اخر السنة هضيع وقت كتيير وف نفس الوقت المس مخوفانى وقالت اللى بيكتب اجابات صغيرة مبيجبش درجات
"ع أساس يعنى ان الاجابة بعدد السطور "

وربنا يجعله فى ميزان حسناتك يا دكتور

كلام المس دا اقرب ما يكون الى البتنجان
الكلام اللي هقوله دا على ضمانتي انا وصحابي اللي قفلوا المواد مش اي حد يعني:
الاجابة على قد السؤال لا اكتر ولا اقل، انشالله تكون كلمتين بس. المصحح مش عايز الرغي المكتوب دا كله، هو بيكون مستني كلمة او كلمتين اول مايشوفهم يدي الطالب الدرجة على طول، اما لو كنت هترغي كتير برا السؤال عشان تحسسي المصحح انك فاهمة بقى وكدا، فدا غلط خالص، المصحح هيحتقرك، وهيفتكرك بتغفليه كمان.
هقولكوا ايه اللي بيحصل في التصحيح : المصحح بيكون قدامه 300 ورقة يصححها في يوم واحد، قرفان من نفسه، و الشغلانة اللي هو فيها و من حياته كلها، لسه متخانق مع مراته قبل مايجي، صايم، غرقان في عرقه، والمروحة اللي فأوضة التصحيح لازم تكون بايظة، بيمسك نموذج الاجابة لاول واخر مرة، بيفتحه عشان يشوف السؤال اللي هيصححه (سؤال مقالي زي علل كدا)
السؤال كان:" علل: تهاجر السلحفاة من هنا الى هناك في فصل الربيع."
الاجابة اللي في النموذج: "لان خصائصها الفسيولوجية لا تمكنها من البقاء هنا في فصل الربيع، حيث ان الزهور لا تتفتح الا هناك، والسلحفاة بحاجة الى شم تلك الزهور لكي تقوم بعملية البناء الضوئي"
هو شاف في اجابة النموذج دي كلمتين او تلاتة بس حلوين وعجبوه، اكيد مش هتكون كلمات ربط جمل او حروف جر او ظرف زي كدا "لان، هنا، بحاجة،تلك" لا خالص، اللي هتعجبه كلمات في صلب الموضوع، كلمات لابد منها مينفعش تجيبلها بديل في الاجابة، كلمات زي دي "الفسيولوجية، الزهور، البناء الضوئي"، الكلمتين دول لزقوا في دماغه وهيفضل مش فاكر من الاجابة غيرهم طول ماهو بيصحح، خلاص هو كدا خد اللي هو عايزه من النموذج، بيكرمش نموذج الاجابة ويرميه ع الارض، او يلفه ويعمل بيه قرطاس عشان هو من هواة جمع القراطيس، المهم زميله يسلمه اول ورقة عشان يصحح السؤال بتاعه اللي هو عليه الدور في التصحيح، يشوف اول سطر من اجابة الواد (اللي عارف الاجابة) ، وعينيه مستنية الكلمتين اللي لازقين في دماغه من النموذج، شاف اول سطر بس، هو مش عنده خلق ولا صبر يكمل للسطر التاني في الجو الصعب دا، لقاه في السطر الاول دا بيشرح الهجرة وتعريفها وبتتم ازاي، وبعدين قال الاجابة المطلوبة بس في اخر سطر، بس المصحح للاسف ماكملش قراية لاخر سطر فراح مديه صفر.
شاف طالب تاني (عارف الاجابة) بس بادئ الكلام، بالسلحفاة وجاب قصة حياتها من اول ما تولدت لحد ماهاجرت، خد صفر بردو.
واحد تالت (عارف الاجابة) راح بادئ الاجابة بالمطلوب بالظبط، وبعدين اتكلم عن الهجرة وقصة حياة السلحفاة، دا خد الدرجة اه، بس ضيع وقته ع الفاضي، في كتابة اللي مش مطلوب وملحقش يراجع، عشان كدا غلط في سؤال غير دا، ونقص درجات بردو.
واحد رابع (عارف الاجابة) راح كتب المطلوب على قد ما السؤال عايز بالظبط، من غير تقصير مخل، وقفل الامتحان، عشان كان عنده وقت كافي يراجع فيه عشان كان بيكتب المفيد بس، مش قعد يفتي ويرص كلام ع الفاضي.

الخلاصة بقى في 3 حالات:
- لو انت عارف الاجابة وحابب تفتي (غير مستحسن) : اكتب الاجابة في الاول، ع الوش كدا وبعدين افتي براحتك بس خد بالك من الوقت.
-لو انت عارف الاجابة ومش حابب تفتي (مستحسن) : انت كدا صاحبي وحبيبي وكفاءة.
-لو مش عارف الاجابة خالص: للاسف هتضطر تفتي، مهما يكن الفتي بعيد عن الاجابة او قريب منها، احسن من انك تسيب السؤال فاضي وتضمن الصفر.

مش اي كلام تقوله المس يبقى صح، مش تخليها تخوفك، انتي صح وهيا الغلط، خلي عندك شخصية، ومش تخليها تتحكم فيكي، عشان متلبيسيش في الحيط اخر السنة.
دي كمان بتدي درس كيمياء وفيزياء مع بعض، لا تعليق بجد، ماتسمعيش كلامها وخلاص.