السلام عليكم ورحمة الله وبركاته اولاً اشكركم على اتاحة ابداء الرأى ولو انى عارف وانتوا عارفين ان مجرد كتابتنا لآراءنا مافيش اى شئ هيتغير ولكن انا هكتب بس على أمل اننا نتكاتف لصد هذا الخطر الرهيب الذى يواجه التعليم فى مصر فإنه وبدون مبالغة أفشل نظام تعليم فى العالم . اننا ولا فخر الدولة الوحيدة التى تحتقر المعلمين وآـسف على هذه الكلمة ولكنها حقيقة انظروا إلى اى مؤسسة أخرى هتشوفوا انهم واخدين حقوقهم انظروا للظباط او المهندسين او الاطباء هتلاقوا حالهم احسن من حالنا بل والفنيين فى المصرية للاتصالات او الضرائب او الكهرباء او البترول الناس كلها بتنسى اصحاب الفضل وكأننا بقينا عالة على مجتمع قيمه بتنهار بسبب حكومة ظالمة وجهل من الشعب وناس وصلت مناصب كبيرة لا تستحقها بالمرة . وعجبى . عجبى على ورثة الانبياء ألا وهم العلماء اشرف طبقة من الناس اللى كانوا بيحترموهم ملوك وخلفاء الدولة الاسلامية ومش الاسلامية بس ده فى كل عصر هتلاقى احترام للمعلم مهما صغر او كبر ومش زمان بس لأ ودلوقتى هتلاقى الدول الاوروبية كلها بتحترم المعلمين هتلاقى مرتباتهم خيالية اعلى من ناس كتير وكمان هتلاقى فى دول الخليج نفس الكلام هتلاقى ان مدرسين مصر مابيصدقوا يلاقوا إعارة برة مصر وممكن الواحد يدفع كل اللى عملوا فى سنين عشان يطلع دولة من دول الخليج وكمان سمعنا كتير انهم بيعاملوهم معاملة مش كويسة . وده كله دليل على فشل الحكومة المصرية فى سياساتها الداخلية . مرتبات لا تكفى شاب لوحده مش تفتح بيوت زائد ان فى ظلم فى توزيع المدرسين كله وسايط ومحسوبية . وللأسف كمان اننا بنظلم بعض يعنى الموجه المحترم بيوزع المدرسين المبتدئين بمزاجه على حسب واسطته ايه . وفى الاخر عشان الحكومة تتهرب من تنفيذ الكادر يعملولنا امتحانات والكل يسقط فيها عشان مايبقاش لينا حجة ويقولوا احنا امتحنا وانتوا سقطتوا يعنى مش عندكم كفاءة يعنى ماتستحقوش الكادر طبعاً سياسة ذكية . احنا هنا بس بنتفنن فى الحاجات اللى بتإذينا بس وأذكياء جداً فى ده . هقول ايه إلا حسبنا الله ونعم الوكيل زى ما عقدوا الشباب وكرهونا فى أشرف مهنة فيها كرم وتفانى ونشر علم . لنا الله من حكومة ظالمة . لنا الله من نفوس ظالمة لا تعطى الناس حقوقها . وآسف على الاطالة . وأتمنى من كل المدرسين التكاتف لصد قلة القيمة اللى بتحصل دى لازم الكل يرفض الامتحانات . قيمتنا اكبر بكتير من الذل اللى بيعاملونا بيه ده .اذا كانوا مش عايزين يطبقوا الكادر فبلاش قلة قيمة اكتر من كده ويسيبونا فى حالنا ولنا الله فهو القادر على ان يستخلف من بعدهم قوم عادلون يعرفون الله ويتحملون المسئولية التى كلفهم الله بها . وشكراً على اتاحة هذه الفرصة لإبداء الرأى . والسلام عليكم ورحمة الله وبركاته .
|