[رفيقة الامل]

المشاركة الأصلية كتبت بواسطة mohamed_hamza

حلوا امتحانات كتير من دلوقتي عشان تطمنوا لاخر السنة اكتر.

حلوا في كتاب الامتحانات نفسه على قد ماتقدروا، مش في ورق خارجي، الكتاب مش هيتحط في المتحف يعني، لما هتبصوا ع الامتحانات في الاخر كدا وتلاقوها محلولة دا بيطمنكم، على عكس لما يكون ابيض ياورد، حتى لو انتوا حالينه برا هتحسوا ان في حاجة ناقصة بردو...
مع ذلك فيه حاجات لازم تتحل برا الكتاب زي المسائل والرسومات... الخ.

المواد العلمية عندكم اربعة، كل يوم تحلوا امتحان في مادتين منهم مثلا، ولما يبدأ شهر خمسة زودوا الكمية شوية.

لو سؤال عارفين اجابته كويس حلوه شفوي، اما لو سؤال جديد او مش ثابت اوي احفظوا حله غيبا واكتبوه.

لو مش فاكرين معادلة عضوية في الامتحان، شوفوها من مصدر االمذاكرة واكتبوها خمس مرات، وانطقوا اللي بتكتبوه.

في امتحان الفيزياء حلوا الرسم البياني، وامتحان الكيمياء اي معادلة تتكتب باليد، الفيزياء اي اثبات او استنتاج اكتبوه باليد، وفي امتحان الاحياء ارسموا الرسمة بالبيانات كاملة، والجيولوجيا كذلك، هتستهونوا بالحاجات دي وتفتكروها تافهة، الحاجات التافهة دي بتضيع اتخن تخين في الثانوية.

والعكس بئا فيه حاجات تافهة فعلا مش تضيعوا وقتكم فيها ع الفاضي، زي كتابة الاجابات اللي انتوا حافظينها صم، زي قطعتين الفهم في الانجلش (كدا كدا هيجيبوا قطعة تانية خالص بأسئلة تانية خالص) ، زي قطع البلاغة اللي كلامها صعب (في الاخر بيجيبوا قطعة عبيطة)، زي التعبير والبراجراف (كفاية موضوع تعبير وبراجراف واحد مرة كل اسبوعين مثلا).

لو انتوا حافظين حاجة قبل كدا، وجه سؤال فيها وانتوا ناسيينها، حاولوا تتعبوا نفسكم شوية وتفتكروا مكان الكلام في الصفحة قبل ماتروحوا تشوفوها، هتستسهلوا وتشوفوا الاجابة على طول هتنسوها تاني، اللي بيجي سهل بيروح سهل...


خدوا بالكوا من دي عشان اهم حاجة، لما تغلطوا افرحوا مش تُحبطوا، ربنا خلاكم تغلطوا الغلطة دي دلوقتي عشان مش تغلطوا فيها اخر السنة، اتعلموا من غلطكم واعرفوا ايه الصح، ومش بس كدا، اعرفوا كمان ايه الطريق اللي وصلكم للغلطة دي عشان ماتكرروش غلطة زيها تاني، هي مش مجرد غلط وعرفنا الصح بتاعه والسلام، لا اكيد وراها سبب: يا اما مش مراجعين الدرس كويس، يا اما بتهملوا جزئيات في الدرس، يا اما مش فاهمين السؤال نفسه كويس، يا اما اتسرعتوا في الاجابة ... يا اما حاجات كتير، فحاولوا تشتغلوا ع السبب وتعالجوه دا عشان تقللوا الغلطات تدريجيا لحد ماتختفي تماما.
...
امتحانات اخر السنة ليها كلام تاني، بس خليه في وقته احسن.

شكراااااااااااا يادكتور ادعيلنا بالله عليك