[Mohamed_Hamza]

المشاركة الأصلية كتبت بواسطة رفيقة الامل

لو سمحت يادكتور
ممكن المرة
دى تكلمنا عن نفسويتك وكنت حالتك النفسية عاملة ازاى خصوصا الفترة دى قاعد اسبوعين ف الامتحان
وكنت حاسس انك فعلا هتحقق حاجة
بعد ثقتك ف ربنا طبعا
ولا كنت حاسس ايه ؟؟؟؟؟

كنت ابرد من الفريزر
حتى اول يوم في الامتحانات يوم العربي كنت رايح الامتحان كأني رايح امتحن امتحان شهر وراجع مش حاسه ثانوية خالص، ودا سر اني حليت فيه كويس.. الناس اللي دخلت على اعصابها دي محلتش كويس وشخبطت في التعبير وكدا..
الايام دي كنت مستعجل الامتحان يعني عايز الايام تجري بسرعة عشان امتحن واخلص..
وكنت بقول طالما ذاكرت طول السنة وتعبت يبقى ربنا مش هيضيع مجهودي عشان هو قال كدا في القرآن "إنا لا نضيع أجر من أحسن عملا"..

كنت في الوقت دا بردو بتمنى الخير لغيري زي مابتمناه لنفسي بالظبط، يعني مش مكنتش بحط فدماغي اني اجيب مجموع اعلى من فلان والكلام الفاضي دا... لا كنت اتمنالهم ربنا يوفقهم بردو. عشان كنت متأكد اني ربنا هيوفقني بسبب النية دي، اما لو قعدت اقارن نفسي بيهم مش هيغير حاجة دا فمجموعهم هما اولا، ثانيا النية اللي مش سليمة دي وحشة ونتيجتها وحشة، ممكن ربنا ميوفقنيش بسببها.

كنت في الوقت دا بردو مطمن لحاجة، ان ربنا من قبل مانتولد كاتب كل حاجة هتحصلنا، يعني اللي هيحصلي في الامتحان مكتوب والنتيجة مكتوبة والكلية وكله مكتوب، فليه اكتئب وازعل نفسي واتكبد العناء على حاجة مكتوبة قبل كدا خلاص؟ فالاكتئاب والزعل دا مش منه فايدة تضييع وقت وخلاص، فالتفكير دا خلاني بارد اكتر مانا بارد، كنت هتجمد..
وكنت بردو بقول لنفسي ان مهما يكن اللي هيحصلي فدا خير ليا لان ربنا اكيد هيوجهني للاصلح واللي فيه الخير ليا، يعني مثلا لو مجبتش مجموع الطب البشري فدا عشان ربنا عارف اني لو دخلت الكلية دي مكنتش هسلك فيها او مش هتبقى منسباني مثلا، او لو كنت دخلتها كنت عملت حادثة ومت مثلا وانا رايحها، فحكاية ان ربنا بيختارلي اللي فيه الخير ليا دي خلتني مطمن اكتر.
اهم حاجة برود الاعصاب عشان تعرفوا تركزوا اليومين دول، وعشان تعرفوا تحلوا في الامتحانات كويس بردو.