** العربي **
بسم الله
اكلمكو شويه عن العربي وبما انها اكتر ماده كنت خايفه منها فكلامي هيفيدكو جدا باذن الله لانه عباره عن محاولاتي خلال السنه
العربي بجد كان عاملي عقده من وانا صغيره وعامله حسابي من قبل ما ادخل انها اكتر ماده هنقص فيها وقد كان
بصو بقى عملت فيها 7 رجاله في بعض وقلت هاخد درسين طبعا موضوع متعب جدا خصوصا ان المدرس التاني كان بيدي حصتين ي الاسبوع فقررت اني هسيب واحد منهم
المهم المدرس التاني ده كان شاطر جدا وكان بيخليني اذاكر بالجزمه كان بيسمع كل حصه وده مطلوب وخلصلنا النحو بدري جدا وده فادني كتير لاني بقيت بحل قطع كتير في وقت كان ناس فيه لسه مخلصتش
بس عيوبه انه مكانش بيعمل امتحانات وحوار ان احنا خلصنا النحو بدري كان مأثر على باقي الفروع اللي هي في الأغلب ما أخدتش حقها في المذاكره
بس دي قصتي مع المدرسين وخلاصتها خليك مع حد بيحل نحو كتير وفي نفس الوقت مركز برضه مع باقي الفروع وبيعمل امتحانات علطول وبلاش درسين في أي ماده بجد حوار متعب وهتيجي على حق باقي المواد
أماكن المذاكره : كتاب المدرسه في التعليق والأدب كلام كنت بسمعه وعرفت قيمته في الآخر بس
كتاب الأضواء أو الرساله مفيدين في معاني الكلمات ومظاهر الجمال في النصوص والقراءه
القصه انا ذاكرتها في الاخر خالص لان استاذي مكانش مديهالنا وفي واحد ع اليوتيوب اسمه محمد السخاوي تقريبا حفظني القصه كنت بسمعه واقراها كذا مره من كتاب المدرسه واحاول احل عليها على قد ما اقدر
الامتحان ده طبعا لازمن ولا بد منه
كتاب حلو جدا واسئلته حلوة وفي الجون وبتلم الدرس كله في كل الفروع ده غير النحو اصلا ده حاجه تانيه كفايه الـ 100 قطعه اللي في الاخر وامتحانات الثانويه العامه لا بجد كتاب مفيد جدا ومن الاخر
ذاكره علطول العربي ده حل نحو كتير حاول تكتب تعبير خلال السنه للامانه انا كان اول موضوع كتبته بعد امتحان تانيه ثانوي كان بتاع امتحان تالته
بس دي حاجه مش كويسه يعني حاول تكون احسن مني
النصوص ذاكرها حلو جدا احفظ معاني وتعبيرات وايحاءات الكلمه وايهما افضل وراي النقاد والتعليق يا جماعه التعليق من كتاب المدرسه
القراءه احفظ اسئله ومعاني كلمات وبعدين ارجع اقرا الدرس كويس من كتاب المدرسه وهي من أسهل الفروع وامتعها
القصه قولتلك فووق بس حاول تقراها وتاخد عنها فكره او تحضر المسلسل بتاعها قبل ما تبدأ
البلاغه حل قطع بلاغه كتير بس مش قووي لانها مبتتكررش خلي اسلوبك حلو في سؤال التجربه الشعريه ودرب نقفسك على الاستخراج الكتير دايما استاذي كان بيقولي اسلوبك حلو في الشرح حتى لو مش فاهمه بتعرفي تحتالي على المصحح
النحو ♥♥
عشقي الوحيد في العربي
خلصو بسرعه وخليك مع استاذ أسامه عز الدين أستاذ عملاق اكتشفته في لأخر للأسف بس استفدت بنصايحه فتره الامتحانات ووما قبلها
حل قطع نحو كتير جدا بجد هتستفاد حتى لو مش مخلص المنهج هتسترجع المواضيع بسرعه حاول تتعلم الاعراب كامل وصح ومتنساش الهمزات واعراب الهاء او ان النون اتحذفت للاضافه الحاجات دي بتاخد بالك منها مع التكرار
الأدب وما أدراك ما الأدب كنت بحبه تخيل ونقصت فيه برضه بس اجابه كانت ناقصه وده بقى بيرجع لاني مكنتش بذاكره من كتاب المدرسه من أول السنه
عاوز حفظ وحفظ وتكرار كتير وعلطول وحل كتابه ومذاكره وحفظ كميه كبيره جدا حاول تفهمه شويه بس في الاخر محتاج تحفظه خليك مع حد بيسمعه علطول وذاكره من كتاب المدرسه
لو تلاحظ خلال النصايح انا كررت كلمه احفظ كتير انا من الناس اللي بكره الحفظ ومبعرفش اصلا بس غصب عنك لو عاوز تجيب فيها درجه لازم تحفظ !
بس ده العربي طولت معلش بس حبيت اقولكو كل اللي في قلبي
وادعولي ربنا يكرمني في كليتي الجديده باذن الله
ربنا معاكو ويكرمكو وحظكو يكون احسن مننا ♥ <3