هام بالنسبه للتعبير
بما إنكم بتتكلموا بخصوص العربى فحابب انبهكم لنقه هامه جدا :
ليه لازم نتدرب على كتابة موضوع تعبير : علشان نظب الوقت علشان لو حصل معاكوا موقف زى الى حصل معاى أول يوم فى الإمتحانات
أيه هو الموقف بقى : لما كنا فى أول يوم طبعا فتشونا وبعد كده قعدونا فى الملعب لغاية الساعه 9 وكمان مفتحلناش باب المبنى علشان المفروض نروح ندور على أماكنا فين بالظبط . الأهم الساعه كانت داخله على 9 وخمسه وفتحوا الباب علشان ندخل . المشكله بقى إن فى المبنى 30 لجنه . فضلنا تايهين نطلع وننزل والملاحظين قاعدين جوه اللجن مش عارفين حاجه ولا ليهمدعوه بينا خالص . وكل ما ندخل لجه يقولنا شوفوا فوق ونطلع فوق يقلنا تحت لغاية ما وصلت الساعه 9 وربع و حوالى ربع المدرسه كانت بتدور لسه على الأماكن بتاعتها في أنه لجنه . فرحت نزلت أنا وكام واحد صاحبى لرئيس اللجنه تحت فراح قلنا على الأماكن بتاعتنا . عبال ما وصلنا اللجنه كانت الساعه 9:20 وعبال ما إستلمنا ورق الإجابه والأسئلة كانت الساعه 9:25 . فقلنا للملاحظ الوقت الى ضاع دوتهنعمل إيه فيه وهناخده ولا لا . فكان كل رده حل على قد ما تقدروا . وبعديها بنصف ساعه كده جه مراقب الدور وقلنا الوقت الى ضاع مننا . فرد علينا بكل بجاحه وقلنا أصلا العربى مبياخدشى اكتر من ساعتين . بصراحه رد مستفز وعصبنى جدا . ولكن مفيش بإدينا حاجه نعملها . والمشكله الأكبر إنى كنت بطئ فى الكتابه علشان خطى يبقى كويس
فأنا أول ما إستلمت الورقه فكرت ولقيت كل الى كنت مرتبله باظ والوقت الى كنت مظبطه مش هينفع خالص . فقررت إنى أبدأ بحل النحو علشان لو خليته للآخر ممكن ميبقاش فيه الوقت إنى أكون مركز كفاية فيه . وبدأ حل وكان النحو سهل جدا وملوش أى لازمه . وبعد كده قرر إنى أحل التعبير الوظيفى وقلت أسيب الإبداعى للآخر . ثم القصه والقراءة . وبعد كده بصيت فى الساعه لقيتها 10:50 وكان قاعدلى أدب وبلاغه ونصوص وكمان أنا كنت سايب التعبير . وفى الوقت الى كنت بحل فيه الأدب كنت بقول لنفسى شكلى مش هلحق أحل التعبير ومليش نصيب إنى أجيب المجموع الى كنت عايز أجيبه . ولكن بالرغم من الكلام دوت كنت مستمر فى الحل . ولكن الحمد لله الأسئله كانت سهله جدا ولقيت نفسى حليت سؤال الأدب بالظبط فى خمس دقائق مش أكتر والبلاغه فى عشر دقائق وكانت الساعه 11:05 فحسيت بتفاؤل . ونفس النظام النصوص كانت سهله جدا وخلصتها وكانت الساعه داخله على 12 إلا تلت . وبدأت أحل التعبير والحمد لله لحقت أكتب صفحتين ونصف . وربنا سترها اليوم ده وطلعت فرحان جدا . والحمد لله جبت 79
المغزى إيه بقى : إنكم لازم تظبطوا وقت العربى وبالذات التعبير لأن اول موضوع تعبير ممكن ياخد معاكم أكتر من ساعه .
|