[محمد محمود بدر]

خلينا نعرف ان اخر احصائية لحوادث القطارات في مصر بتقول ان عددها في اخر ٥ سنين وصل ٣٩٩٦ حادثة نتج عنها ٣٥٨ قتيل و ٥٨٣ مصاب طبقا لهيئة السكة الحديد .. وقبل كده كان فيه حوادث اكبر .. ابرزهم على الاطلاق حادثة ( العياط ) في ٢٠٠٢ واللي اتوفى فيها ٣٥٠ شخص بالرقم الحكومي المعلن .. واللي اتكذب بعد كده وطلعت تقارير قالت انهم فوق الـ ١٠٠٠ شخص مابين حرق واصطدام وتكدس .. وفيه ناس ماتت من دهس الناس المزعورة عليها .

انفوجرافيك جريدة الاهرام للحوادث : http://goo.gl/jF1d5u


تقرير تاني ممتاز : http://goo.gl/PHwqF7


مرجع عدد الحوادث : http://goo.gl/UF2aNi






على كلام الدكتور / سعد الجيوشي وزير النقل ان احنا في مصر عدينا - والحمد لله - المعدلات العالمية لحوادث القطارات بمعدل ١٤٠٠ حادث سنويا .. مشمولين طبعا بحوادث الدهس العادية .. زي واحد راكب حمارته ولقى المزلقان مفتوح قام معدي والقطر جاي فكله هو والحمار .


مرجع تصريح الوزير لجريدة التحرير : http://goo.gl/SQ3QU3







لكن وللامانة والانصاف مش احنا الاسوء في حجم كوارث القطارات العالمية .. احنا لسه مركزنا العاشر .. لكن ببركة السادة المسئولين ونفسهم معانا هنلعب قريب على مركز متقدم وهناخد الدوري .. وكفاية ان مصر كانت المركز التاني بعد بريطانيا على مستوى العالم في تطور السكك الحديدية في ايام الملكية .. ودلوقتي بقينا في المركز الـ 87 .

مرجع ترتيب مصر في كوارث القطارات : http://goo.gl/7wbKU1

مرجع ترتيب مصر ايام الملكية .. ( تقرير يبكي الحجر ) : http://goo.gl/Vx70mS





نرجع لموضوعنا الاهم وهو محطة ( العياط ) واللي حصل فيها اسوأ ٥ حوادث قطارات في تاريخ مصر الحديث ..


طب ليه المحطة دي بالذات ؟


.. عشان نعرف لازم نفهم ان غالب التحويلات دلوقتي بتشتغل بنظام التحكم الاوتوماتيكي بدون تدخل من عامل التحويلة ولا السواق .. وده بتصريح رئيس السكة الحديد نفسه امبارح .. لكن المفجع بقى لما نعرف ان محطة العياط من المحطات القليلة جدا اللي النظام الاوتوماتيكي بايظ فيها من خمس سنين !!

مرجع التصريح : http://goo.gl/KFwoC2

مرجع عطل محطة العياط : http://goo.gl/1bdCw6


في التصريحات الرسمية بيتقال ان الحادثة بتاعة امبارح تمت بنفس الخطأ المتكرر لعامل التحويلة واللي قام بتغيرها غلط بسلامته ولبس القطر في هيكل خرساني خلى الجرار ومعاه كذا عربية يخرجوا عن الخط ويتقلبوا .. وتكون النتيجة وفيات ومصابين .. ونضيف عليهم خساير في ( عربية طرود بريدية ) كانت رايحة الصعيد وعارفين طبعا الطرود اللي رايحه الصعيد بتبقى شكلها ازاي ومين اللي محتاجها .

مرجع الحادثة كاملة : http://goo.gl/IznRlD


طلع فجأة تصريح من مسئول نشرته اكتر من صحيفة بيقول ان غير مستبعد الشبهة الجنائية في الموضوع .. .. يعني محطة العياط ممكن تكون هي محطة الطرمخة على حاجات في القطر من زمان .. زي مثلا الطرود البريدية ومكاتبتها ؟؟ واهو مجرد تفكير بصوت عالي .

مرجع التصريح : http://goo.gl/KmTCdI





الاعلام طبعا دلوقتي غير .. واي حادثة هتحصل بيتطبل للمسئول .. لكن كل طبلة بايقاع مختلف عشان تجيب مع كل الاذواق .. يعني مثلا ( الغيطي ) طلع قال مبارك المسئول ولو انه كان بيقول قبلها مرسي ايام مرسي .. وقال كمان دلوقتي ان لازم الجيش يتدخل .. ليه يعم هي حرب ؟؟ .. وكذا تصريح اعلامي من مذيع هنا وهناك لتلميع الحكومة وتنفيض الغبار عليها .. اعلاهم على روتانا مصرية لما جاب المذيع صورة الضحايا وقام مشغل السلام الوطني .. ووالله هتلاقوا نفسكم تلقائيا بتقولوا ( تحيا مصر ) .


مرجع : http://goo.gl/QRuhih






في شهر 11 / 2015 السنة اللي فاتت وزيرة التعاون الدولي / سحر نصر اتفتحت لها ميزانية وعملت اجتماعات مع البنك الدولي لتطوير منظومة السكك الحديدية على نسق ( اوربا واستراليا وكندا ) وطبعا منعرفش اتصرف كام كالعادة .. لكن الوزيرة طلعت ساعتها وقالت المواطن هيرتاح اخر راحة في القطر .. واهو ارتاح الحمد لله .. فبعد الحادثة امبارح طلع تصريح من النائب البرلماني / ماجد طوبيا وطلب كشف حساب على ( المليارات ) اللي اندفعت في المنظومة دي .. وليه لازالت فاشلة ؟ ..

اه ليه بصحيح ؟! .


مرجع وزيرة التعاون : http://goo.gl/5WHVai
مرجع النائب : http://goo.gl/2rS8RQ


كذا بيان من هنا ومن هنا برقم فلوس التعويض للمتوفي والمصاب .. وللانصاف اكبر رقم اتقال من مسئول هو ٢٠ الف واقل رقم ١٠ الاف .. مش خمسة زي ما غالب النشطاء بيقولوا .. بس اما نعرف ان التعويضات وصلت في السعودية ٢ مليون ريال بما يعادل 6 مليون جنيه عن القتـل الخطأ زي حادثة رافعة الحرم وتكدث الجمرات .. والقتـل العمد وصل لـ ٢٢ مليون ريال حسب قناة العربية .. وان الدية ملهاش حد في بعض الدول الاجنبية .. والدولة بيترفع عليها قواضي وبتدفع تعويضات عالضرر النفسي للمواطن !!! .. فلما نييجي نقارنهم بتعويضات الحكومة المصرية بالحاجات دي نقول ايه .. بلاش تعالوا نقارنها بسعر ايفون ٧ اللي تم الاعلان عنه في نفس يوم الحادثة بـ ١٢ الف جنيه ..

هنعرف اوي قيمة المصري لحكومته بقت قد ايه .


مرجع التعويضات الحادثة : http://goo.gl/ufbnAx
مرجع الديات بالسعودية : https://goo.gl/info/Ic9vjO


طب هل فيه تجارب نجحت لتطوير منظمة سكك حديد كانت فاشلة ومليانة حوادث وقدرت تتطور .. اه فيه وكتير كمان .. ابرزها الصين اللي دلوقتي من افضل دول العالم في تطبيق منظومة القطار فائق السرعة .. وقربت تعمل ابو 500 كم في الساعة .. بعد ما كنت الصين والهند هما الاسوأ على الاطلاق .. وكمان ماليزيا اللي ( مهاتير محمد ) كان عايز يربط اسيا باوربا بسكك حديد بسبب نجاح المنظومة عنده بعد سنين من فشلها .. وكلمة السر هي مكافحة الفساد .. ولما نعرف ان المعايير العالمية لتصنيف جودة القطارات من ( أمان - سرعة - مواعيد - ثبات دون اهتزاز – نظافة ) مش موجود عندنا ولا واحدة فيهم الا ما ندر .. يبقى اللي يروح يركب قطر يفكر الف مرة قبل ما يركبه أو ينصح قريب له بركوبه .

مرجع الصين : http://goo.gl/RdLTP6
مرجع ماليزيا : http://goo.gl/4wIjsR





اخيرا ...

السؤال الابدي السرمدي ..

هي مسئولية مين الحوادث دي كلها ؟

.. الاجابة : محدش يعرف ..

بس المسئولية مش بعيده ابدا عن مسئول جه ومحاولش يصلح اخطاء اللي سبقوه .. عشان اصلا محدش بيتحاسب .. غير انهم في النهاية يكيلوا الاتهامات على راس سواق القطر الغلبان اللي التحويلة هي اللي بتجيبه يمين وشمال ..
وييجوا يسألوا رئيس هيئة السكة الحديد امبارح عن السبب ..
يقولهم ((( نصيب ))) !!!