[محمد محمود بدر]

ركزوا معايا شوية عشان الراجل ده محتاج تركيز

اسمه البروفسور فيكتور رزق الله

وصل المانيا في نهاية الخمسينات وكان معاه بكاورليوس هندسة من مصر

مش محتاج معادلة لإن التعليم بتاعنا وقتها كان زي الالماني
تخيلوا بقي ماكانش بيعرف يتكلم الماني اصلا

اتعلم اللغة وبعدين بقي عنده دكتوراه

اتقدم عشان ياخد الاستاذية

الناس استغربت ازاي واحد مش الماني ياخد الاستاذية في الجامعة
هناك صعب جدا انك تاخد دكتوراه ومستحيل تاخد الاستاذية الا إذا كنت عالم قدمت خدمات جليلة للبحث العلمي

بفضل علمه كان اول واحد غير الماني في تاريخ المانيا ياخد الاستاذية في الهندسة

وبما إننا فتحنا باب اول واحد نكمل بقي

هو أول واحد غير الماني يبقي عميد كلية هندسة جامعة هانوفر
طب تصدقوا إنه أشرف علي دكتوراه لتلميذ مصري اسمه نبيل فؤاد لحد مابقي بروفسور زيه وفضل وراه لحد مابقي تلميذه عميد هندسة هانوفر دلوقتي

هو كان أول واحد من أصل أجنبي ياخد منصب نائب رئيس جامعة هانوفر

هو أول واحد من أصل اجنبي يبقي نقيب المهندسين في هانوفر

ايون والله العظيم حصل

نقيب المهندسين في هانوفر الالمانية ولمدة ٨ سنوات مصري من الاسكندرية

ياعم إحنا هنقضيها نظري هو عمل إيه يعني غير الدراسة ؟

هاقولك ياسيدي البروفسور فيكتور رزق الله هو اللي صمم انفاق مترو هانوفر

عارفين انه عمل مترو ٣ ادوار تحت الارض فين؟

في المانيا يامؤمن ؟ !

طيب ده صمم ونفذ كمان أكبر ميناء للحاويات في العالم برده في المانيا يامؤمن

ادوله ارفع وسام في المانيا وهو صليب الاستحقاق واستلمه من المستشار الالماني شرودر وقتها

تخيلوا بقي انه بيتكلم انجليزي وفرنسي وايطالي واسباني والماني وعربي ولغات ثانية مجموعها ٨ لغات واليومين دول بيتعلم صيني

العلم بالنسبة له معرفة والمعرفة لازم تكون باللغة الاصلية لكل بلد

والله العظيم بيموت في تراب مصر

مجرد ماطلب منه يحضر مؤتمر بعلمائها مصر تستطيع
قال حاضر

بروفسور فيكتور هو عضو في المجلس الاستشاري العلمي لرئيس الجمهورية عبد الفتاح السيسى وبيحضر أفكار مشروعات مهمة جدا للبلد في التعليم هاتسمعوا عنها قريب

وهيقدم أفكار في المؤتمر جديدة للبلد

المؤتمر اللي بتنظمه وزارة الهجرة مع شبكة تليفزيون النهار
نسيت اقولكم اللي وراه في الصورة الاولي جزء من البنك المركزي لهانوفر اللي صممه ونفذه برده البروفسور فيكتور رزق الله

والصورة الثانية في الدور الثالث تحت الارض لمترو انفاق هانوفر