[محمد محمود بدر]

تابع


الازمة اللي لازم الناس تبص لها وتبعد عنيها شوية عن ( بص عصفورة احمد الوكيل ) .. هي ان عدد 2 الى 4 مليون شخص بيشتغلوا في انتاج الدواجن هيتوقف حالهم بعد دخول الدجاج المستورد .. وانهيار الصناعة الوطنية قدامه بقيمة 20 مليار جنيه .. واللي تقريبا الوحيدة اللي محققة 93 % اكتفاء ذاتي من اللحوم البيضاء في السوق المصري .. بعدد 2 مليون طائر يوميا ..


بالاضافة لنسبة 100 % اكتفاء ذاتي من البيض .. واللي اسعارهم مارتفعوش الضعف زي معظم السلع .. لان الدولار في الصناعة دي بيلعب دوره في أمصال وادوية الدجاج والاعلاف فقط .. فلما يبقى كيلوا العدس وصل لقرب ٣٠ جنيه ، ولسه الفراخ تحت العشرين يبقى الدجاج المستورد - بكل مخاطره وعيوبه - غلط يدخل البلد ..


مرجع



الدجاج المستورد لو دخل بقوة وانهار القطاع المحلي منه .. فهيبقى السوق عرضة لقفذات الدولار .. لان الاستيراد بيتم بيه .. ولو رجعت الجمارك تاني على استيراد الدجاج فسعر الكيلوا هيبقى هو وكيلو اللحمة سواء .. لان ساعتها مش هيبقى فيه منتج وطني ينافس ويقدر يغطي العجز الموجود .. زي اللي حصل لازمة السكر بالمللي ..


الحكومة بالقرار ده مش بس بتدمر الصناعة الوطنية والانتاج المحلي .. لأ .. دي بتستهلك عملة صعبة غاية في الضخامة في استيراد منتج لا غنى عنه لاي بيت او مطعم او فندق مصري .. وكمان خسر ميزانية الدولة 200 مليون جنيه خلال فترة الـ 6 شهور اللي هيتوقف فيهم تحصيل الجمارك ..

مراجع كوارث ازمة الدواجن بالارقام 1


مراجع كوارث ازمة الدواجن بالارقام2


طب ليه بقى الحكومة تعمل ده كله ؟؟؟

بسم الله الرحمن الرحيم .. الاجابة ( روسيا ) ..


في شهر ابريل اللي فات اعتمدت وزارة الزراعة عدد 12 شركة روسية لتصدير الدواجن لمصر .. والمستورد اي حد .. وفيه شركات تابعة للجيش بتستورد عادي .. وده برغم ان لو حد راح لاي دولة في العالم مش هيلاقي الدجاج الروسي بينافس بسبب جودته المتدنية .. وشركة ( تشيركيزوفو ) الروسية اعلنت انها دخلت في شهر يونيو اللي فات كمية تقدر بـ 270 طن وعلى اخر السنة هتوصل لـ 10 الاف طن !!


مرجع القصة الكاملة :



لو وسعنا الرؤية شوية وبصينا على كذا صفقة روسية لمصر .. اهمها القمح الروسي اللي عمل ازمة قريب بسبب اصابته بفطر ( الارجوت ) المسبب للاورام السرطانية .. لو فاكرين لما رفضت وزارة الزراعة دخوله .. وروسيا رفضت هي كمان استيراد الخضروات والفواكة من مصر .. فمصر اتراجعت عن قرارها واشترت 240 الف طن قمح .. ومعاهم خسارة مصر لحلفائها العرب بسبب تصويتها للمشروع الروسي في مجلس الامن ..

رفض الاستيراد من وزارة الزراعة


موافقة وزارة الزراعة على الاستيراد



ساعتها نتكلم عن العلاقة المشبوهة بين النظام دلوقتي والنظام الروسي القائم بدل مايرفع الجمارك عن الفراخ .. طب ما يرفعها عن مستلزمات انتاج الدواجن .. زي بذور الذرة الصفرا والاعلاف والامصال والادوية للدواجن كلها .. واهي الحكومة دلوقتي بتدور على حلول بسبب الضغط الشعبي .. لكن لسه ما وصلتش .. وسيبوكم من اشاعات الغاء القرار .. هي مش بصارة هي تتطبخ وتندلق ومحدش ياكلها ..

بحث الحكومة عن حلول للازمة من جريدة الاهرام


اخيرا .. النظام دلوقتي في مصر بيتعامل مع المصريين بعقلية اوائل القرن اللي فات .. يعمل المصيبة والازمة من هنا .. يقوم جايب كذا موضوع يتلهي فيه الشعب عن المشكلة الرئيسية من هنا .. شوية الاخوان .. شوية كلام اهبل زي ( مناخ تشاؤمي ، سلع الاستفزازية ، اسطورة احمد الوكيل .. الخ ) .. واحنا نسف عليهم وننسى المشكلة الاصلية .. نسيب الجمل اللي برك مننا في الصحرا وعلى وش موت .. ونمسك في بردعته اللي مش معدولة ! .



انتهى