[محمد محمود بدر]

الصور البشعة دي للقبض على مجموعة من أجدع شباب مصر اللي نزلوا امبارح يعلنوا بسلمية وتحضر موقفهم بإن تيران وصنافير مصرية ..



أياً كان رأيك في موقفهم، دول ناس نزلوا لقضية وطنية بحتة، بيقولو الأرض دي من بلدنا، الأرض دي جيشنا حارب عشانها، ومات عساكر مصريين كانوا بيحموها.




هل دي جريمة تستوجب القبض عليهم؟


وكمان نفس الأسلوب القديم جداً، أفراد شرطة بملابس مدنية هما اللي يقبضوا بالضرب والسحل؟ عيب فعلاً نقول شكليات زي ان القانون بينص على الملابس الرسمية، وعلى حسن معاملة المتهم .. عيب نقول كده اذا كان القانون والدستور بيتمسح بيهم الأرض كل يوم، والقصة دي في جوهرها عدم احترام القضاء اللي قال بحكم واضح ان الارض مصرية، وبعدين الحكومة طعنت، وموعد النطق بالحكم النهائي عند المحكمة الادارية العليا يوم ١٦ يناير، فاللي حصل هوا التهرب من القضاء بإحالة مفاجئة وعاجلة للبرلمان!


ولما انتم واثقين جدا من موقفكم انها سعودية ليه منتظرتوش أسبوعين جايز الحكم النهائي ينصفكم مادام مش عاجبكم حكم أول درجة؟


هوا القضاء ده كمان من شباب الثورة اللي مش عاجبينكم؟!


هوا القضاه دول كمان هتقولو عليهم ممولين؟ ولا خونة؟ ولا عيال مش فاهمين؟


وليه محامي الدولة في اول درجة مقدمش اي مستندات اصلا لحد ما اتحكم ضده؟



وليه في تاني درجة واضح جدا الفارق بين محامي الدولة اللي قدم مستندات ضعيفة وفاقدة حتى للمعايير الرسمية للاعتماد (مخاطبات بدون اختام رسمية!)، وبين محامو الادعاء اللي قدموا خرايط رسمية ووثائق كتير؟


كل ده على مستوى الوثائق، وزي ما قلنا أصلاً القضية أكبر من الوثائق، لأن مصر مارست بالفعل سيادة متصلة تشمل الحرب أعلى مظاهر السيادة .. هوا الجزيرتين دول ظهروا فجأة يعني، بينما كل الرؤساء السابقين مكانوش واخدين بالهم "يرجعو الحاجة لأصحابها"؟!!



- حمدي قشطة، واحد من معتقلي الأرض في المظاهرات اللي فاتت بدأ حملة توقيعات، من كل اللي اتقبض عليهم بسبب القضية، وحتى الآن وقع على البيان ٨٥٢ شاب اتقبض عليهم من المظاهرات، أو من القهاوي، أو من بيوتهم.







- ولما أولادنا في المستقبل يسألوا كنتو فين هنقول كنا بنقاوم بكل حاجة بايدنا، بالكتابة وبالكلام وبالتظاهر، والشباب الجدعان، أطهر ما في مصر، دفعوا التمن من أجسادهم، وحياتهم، وشغلهم، وفلوسهم (٤ مليون و٧٠٠ ألف جنيه مجموع غرامات القضايا).


- التوقيعات دي، وكمان الصور المؤلمة الجديدة، كلها عار رهيب هيفضل يلاحق كل المتسببين، من أول رئيس الجمهورية عبدالفتاح السيسي صاحب القرار السياسي بالقضية كلها، ومروراً بكل نائب هيصوت بالموافقة ضد الدستور اللي اقسم على الالتزام بيه، ولحد أصغر ظابط واقف بيقبض على الشباب الجدعان بنفسه.