السلام عليكم ورحمه الله وبركاته
ازيكم جميعا ....ان شاء الله تكونوا بخير
كنت عايزه ابدأ اول مرحله من مراحل الثانويه ....وادى بعض النصايح من تجربتى ...متهيالى لو كان حد نصحنى اى نصيحه منهم كان حالى كله اتغير
اولا الطلاب اللى داخلين اولى ثانوى ..بيكونوا تلات اصناف ..ياما فى مدرسه لحد اعدادى بس ...وهيروحوا
مدرسه جديده فيها ثانوى ...(وده حال معظم الناس )...ياما من مدرسه اعدادى وفيها ثانوى فهيكملوا فيها
ياما اخدوا معظم المراحل التعليميه من دوله غير مصر وجايين ياخدوا الثانوي من مصر (ودى حالات قليله )
وطبعا النوع الاول والتالت ده اكتر ناس بوجه كلامى ليهم ..ليه ؟؟...لانهم هيتعرفوا على اصحاب جداد لاول
مره يشوفوهم ...فلازم الحزر ......لان ممكن الواحد يكون متفوق طول عمره .....ويجى واحد صحبه يغيرله كل افكاره ......تدريجيه فى تدريجيا يتحول لواحد تانى ........والعكس صحيح
طبعا اكتر جمله هتسمعوها من اصحابكوا ...هتلاقيهم واقفين بكل شموخ كده ويقولوا ....اولى ثانوى مش لازم نزاكر فيها ...دى مجرد مرحله انتقاليه بين تالته اعدادى وثانويه عامه ...ولازم نرتاح فى اولى ثانوى عشان نحوش طاقتنا لثانويه عامه اللى هتحدد هندخل كليه ايه ....وطبعا انت او انتى اول ماتسمعوا كده هتقتنعوا علطول ...وصدقونى ده بيحصل وهيحصل معاكوا ....
وبالنسبه للبنات بقى من اول يوم فى الدراسه هتلاقى البنت تقول لصحبتها ...شوفتى امبارح مسلسل كزا اللى بيتزاع على قناه كزا الساعه كزا ...بصى انا هقولك قصته عشان لما تروحى تشوفيه ماتحسيش ان فى احداث نقصاكى ....وتمسك ودنها وتسمعلها السيناريو ....وده برده بيحصل ....
وهتلاقى ناس...تقولك انا مش بزاكر تاريخ ولا جغرافيا اصل انا داخل علمى ..فهزاكرهم ليه ....وناس تانيه تقولك انا مش بزاكر ولا احياء ولا كمياء ولا فزيا ولا رياضه ...اصلى انا داخل ادبى ازاكرهم ليه
وهتلاقى ناس تانيه تقول انا بروح النادى تلات ايام فى الاسبوع غير خميس وجمعه ده اساسى ...
وهتلاقى فى النوعيه اللى بتقول كده ناس مش مشتركه فى نوادى اصلا
والافظع من ده كله ...هتلاقى ناس مش بتروح امتحانات الشهور اصلا ....انا واحده قريبتى لحد امتحان اخر السنه اكتشفت ان عندها نص هى متعرفوش واول مره تشوفه ..
وبالنسبه للبنات ..اللى داخلين مدرسه ثانوى جديد ...هيشوفوا العجب ..العجب بجد ...هتشوفوا نوعيات بنات اول مره تشوفوها ...من تصرفات وطريقه كلام ..وندغ اللبانه ...وهتلاقوا بنات مش بس بيندهوا المدرسين باسمأهم من غير مستر ...لا كمان بيدلعوهم ...والنوع ده بيحبوا المدرسين ضعاف النفوس
كل دى تصرفات غلط فى غلط ....وياريت متأثرش فيكوا ...ولا تغلبكوا ..وتلاقوا نفسكوا كده ..فاولى ثانوى مرحله اعداد لثانويه عامه ..هتتعلموا فيها ازاى بيكون فى جد فى المزاكره ...عندى مواد كتير لازم اخلصها ....امتى وازاى استريح ...اقضى وقت راحتى فى ايه ...ايه افضل معاد مناسب ازاكر فيه ...
وبجد الناس اللى مش بتتهيا كويس فى اولى ثانى ...بيكون الموضوع صعب عليهم جدا جدا فى ثانويه عامه .وانا جربت ده ..لانك ببساطه ..ازاى وانت فى اولى ثانوى جايب من 70..الى 85%....عايز تجيب فى تانيه وتالته ثانوى 95%..فيما فوق
لازم تكون جهزت نفسك..ولو فى ماده حاسس انك ضعيف فيها مافيش مانع تاخد درس .واحزروا المدرسين اللى كل دروسهم هزار وكلام فاضى واخر الحصه يقول كلمتين عشان يرضى ضميره ويحلل الفلوس .
وياريت تروحوا المدرسه كل يوم وماتغيبوش ...لانكوا برده هتلاقوا ناس مش بتيجى غير فى الاسبوع مره ده لو جات ...وماتهملوش كراستكم وكتبكم وكده
وياريت تاخدوا كورسات فى اللغه الانجليزيه واللغه الاجنبيه التانيه ...عشان تقدروا تجيبوا اكبر درجات ممكنه فى الثانويه العامه واكيد الكورسات دى هتنفعكوا جدا فى حياتكم
واوصيكم خيرا بالرياضه ..لان رياضه اولى ثانوى فعلا فعلا اساس لرياضه تانيه وتالته ثانوى ..ولو مش
فاهمين فيها اى حاجه اسالوا مدرسكم ...واوصيكم خيرا بالعربى والبلاغه ..لانكم هتكونوا اول مره
تسمعوا يعنى ايه بلاغه ..ياريت متهملوهاش لانها مهمه لتانيه وتالته ثانوى .والنحو طبعا ده مهم برده
..والنصوص هتتعلموا ازاى تزاكروا فى تانيه وتالته ومش هتنسوا كنتم بتزاكروا ازاى فى تالته اعدادى
..اوصيكم خيرا بالعربى كله ..اوصيكم خيرا بالغه
الانجليزيه ...لانك لو شاطر فيها طول عمرك واهملتها فى اولى ثانوى هيحصلك دروب وانتا داخل تانيه
ثانوى ..وهتحس ان الموضوع كبير اوى ...وبرده ماده اساسيه وتراكميه ...واوصيكم خيرا باللغه التايه
اهتموا يا جماعه بيها احضروا الشرح فى الفصل ..ولما تروحوا زاكروا وهاتوا كتب خارجيه وحلو عليها وكده
لا تهملوا الفزيا والكميا ...لان فيها من مناهج ثانويه عامه ولا تهموا التاريخ والجغرافيا لانهم هيفيدوكوا
وغير كده هيعلموا ازاى تزاكروا المواد دى
واتمنى ليكوا التوفيق طبعا وتقضوا سنه لطيفه لان انا بالنسبالى اولى ثانوى كانت سنه كبيسه