بمناسبة مقولة الرئيس عبد الفتاح السيسي للمصريين : أنا عملت اللي عليا .. انتوا عملتوا إيه ؟!!
تعالوا نشوف المصريين عملوا إيه ..
* اتصدوا لمخطط التوريث بتاع جمال مبارك وعملوا ثورة أبهرت العالم كله ، لولاها كان زمان قيادات وزارة الدفاع بيدوا التحية العسكرية لجمال مبارك دلوقتي ..
* اتصدوا لهمجية جماعة الاخوان وارهابهم ، وكملوا حراكهم الشعبي ضدهم في 30 يونيو ، ولولاهم كان زمان الريس بيدي التحية العسكرية لمرسي دلوقتي ..
* انتخبوك رئيس للجمهورية علشان تحقق أحلامهم في العيش والحرية والعدل والكرامة والاستقلال ..
* استجابوا لقراراتك الاقتصادية المجحفة في رفع الدعم و تعويم الجنيه ، وقالوا مش مشكله نستحمل علشان البلد تقوم ..
* تجاوزوا عن قوانين كتير مش في صالحهم زي الخدمة المدنية والقيمة المضافة ، و قالوا نجوع شوية بس ادينا عايشين ..
* زادت سياسات الافقار والتجويع لصالح الاغنياء ، وقالوا الحمد لله .. ربنا خلقنا درجات واحنا راضيين بقليل القليل ..
* بيشجعوا ولادهم علي التصدي للارهاب والحرب عليه ، وبيستقبلوا جثامينهم بزغاريد الوجع ، وبيقولوا احسن ما نبقي زي سوريا والعراق !
* دفعولك 60 مليار جنيه في 4 أيام من قوت عيالهم لما قلت عايزين نعمل مشروع قومي في قناة السويس الجديدة ، ومحدش حاسب حد علي فشله ..
* اتسابقوا في التبرع لصندوق تحيا مصر زي ما طلبت ومن جنيه لالف ، في الوقت اللي رجال اعمالك متبرعوش زي مانت نفسك قلت ..
* الدكتور فيهم شغال محاسب ، والمحاسب سباك ، والمحامي كهربائي ، والمهندس ميكانيكي .. ومقالوش حاجه .. ماهو لازم المركب تمشي !
* سافروا بره وبيبعتوا عملة صعبة للبلد تقومها ، ومترحموش من الضرايب ولا الاتاوات ساعة السفر ، وقالوا وماله .. البلد محتاجه ..
* سابولك الفكة .. وقالوا مش مشكله ماهي مبتهونش الا ع الغلبان ..
* حرموا نفسهم من اللحمة بعد ما وصلت 120 جنيه للكيلو ، وقالوا مش هنموت من غيرها يعني .. في الوقت اللي فيه الرجالة الا بالى بالك مفيش عندهم حساب للقمة العيش !
* اتضاعفت الاسعار 300% وقالوا طالما ربنا ساترها خلاص .. ما اللي فيها لله مبتغرقش ..
* مرتباتهم ومعاشاتهم ملاليم ومرتبات ومعاشات الرجالة في القضاء والشرطة والجيش بالملايين وقالوا وماله .. هنساوي نفسنا باللي بيحمونا يعني ..!
* دافعوا عن أرضهم في الوقت اللي كان فيه الارض بيتفرط فيها ..!
* اتنازلوا عن حقهم مؤقتا في الحرية وموقفوش جنب شبابهم اللي بيناضل علشانهم ، وقالوا مش وقته ، نجرب الاستقرار شوية .. يمكن العيب في الثورة ..
* دافعوا عنك في وقت محلفاءك خانوك ، واصدقاء الامس باعوك ، وقالوا لا رمز دولتنا وهنقف معاه ..
* سمعوا كلامك في الصغيرة قبل الكبيرة ، وخونوا المعارضة الوطنية علشان نور عنيك يمكن تصدق ..
* استحملوا اهدار كرامتهم في الداخل والخارج ، وسموها تضحية علشان يقدروا يعيشوا ..!
* تروح لروسيا يقولوا تحرر ، ترجع لامريكا يقولوا مصلحه ، توطي للسعودية يقولوا قومية .. بس المركب تمشي !
* تطلع عصابة مبارك براءة يقولوا ده القضاء ، تماينها مع الاخوان يقولوا علشان خاطر البلد ، تواجه الثوار يقولوا ماهم يستاهلوا ..
* كورة مفيش .. حاضر ، سياسة مفيش .. وماله ، متسمعوش لحد غيري .. تعدي ، محدش يتكلم في الموضوع ده تاني .. تؤمر .. !
* قلت لهم بكره تشوفوا مصر ، واهم بيشوفوها بتقسي عليهم وبيقولوا لسه بكره مجاش .. ولما طلبت 6 شهور كمان قالوا نصبر هو احنا يعني في ايدنا حاجه غير الصبر ..
بعد ده كله .. بتسألنا عملنا إيه .. !!
يا ريس؟؟؟؟
إنت اللي عملت إيه ؟!!
منقول بتصرف