اطلق حصانك ف المدى المجهول
الصحرا وسعت بما يكفى لحد الموت
وانت اللى فاضل من خضار الغِنا وسط السكوت
فاحسب سنينك فى ثوانى المطر
فات اللى فات من دهشة امبارح
وادى اللى جاى سانن سنان المصير
من جوع ولادك يتخنوا ولاده
فاصحى للون الزمن يابن انكسار الروح
والضم فؤادك فى الهوا السارح
من نن عين الخرافة/نن عين الموت
ومن المدى المجهول للمدى الواضح
وبحد سيفك تشيل شال الفقير راية
عدد الغلابة كتير..فرّق وما تعدش
وفى انتصار الحياة واكبر على جروحك
أنا بسألك إنت.. أنا بسألك إنت.